उच्च पदस्थलाई ज्यान मार्ने धम्की दिने प्रकाश पाठकलाई लिन नेपाल प्रहरीको टोली फिलिपिन्स जाने भएको छ।
डिसेम्बर ३१ मा मालोलस सिटीमा पक्राउ परेका ३३ वर्षीय पाठकलाई लिन नेपाल प्रहरीको इन्टरपोलको टोली फिलिपिन्स जान लागेको हो।
प्रहरीका उच्च अधिकृतका अनुसार फिलिपिन्समा उनको कागजी प्रक्रिया भइरहेको छ।
‘यहाँबाट लिन जान नेपाल प्रहरीको टोली तयारी अवस्थामा छ। त्यहाँको काम सकेपछि बोलाउँछन्,’ ती अधिकृतले भने, ‘त्यसपछि यहाँबाट टोली जाने हो।’
पाठकलाई फिलिपिन्सको ब्युरो अफ इमिग्रेसनको फ्युजिटिभ सर्च युनिटले फिलिपिनी नेशनल पुलिससँगको संयुक्त अपरेशन गरी पक्राउ गरेको थियो।
पाठकले अख्तियार दुरूपयोग अनुसन्धान आयोगका प्रमुख आयुक्त प्रेमकुमार राईसहित १० जना उच्च पदस्थ व्यक्तिहरूलाई धम्क्याएको आरोप छ। उनले फिलिपिन्समा बसेर सामाजिक सञ्जालमार्फत धम्की दिने र एक्स्ट्रिमिस्ट ग्रुपको मानिस रहेको दाबी गर्दै आएका थिए।
उनले अख्तियार प्रमुख राईलाई १० दिनभित्र राजीनामा दिन र नदिए मार्ने भनेर इमेल पठाएका थिए। यसरी उनले इमेल पठाएको जानकारी नेपाल प्रहरीले पाएपछि खोजी सुरू भएको थियो।
त्यस्तै, काठमाडौं जिल्ला अदालतबाट पक्राउ पुर्जी र इन्टरपोलमार्फत डिसेम्बर १२ मा डिफ्युजन नोटिस समेत जारी भएको थियो।
ब्युरो अफ इमिग्रेसनले डिपोर्ट गर्न प्रक्रिया गरिरहेको जनाएको छ।
-1746009348.jpg)
