राजश्व अनुसन्धान विभागले काठमाडौं-३१ को देवी इम्पोर्ट एन्ड एक्सपोर्ट र सञ्चालकविरूद्ध जिल्ला अदालत काठमाडौंमा मुद्दा दायर गरेको छ। उक्त कम्पनीका प्रोप्राइटर देवी भगतले कपडा भन्सार चोरी पैठारी गरी राजश्व चुहावट गरेको अभियोगमा विभागले शुक्रबार मुद्दा दायर गरेको हो।
विभागका अनुसार एक करोड २६ लाख बिगो र तीन वर्ष कैद माग गर्दै सञ्चालकलाई मुद्दा दायर गरिएको हो।
देवी इम्पोर्ट एण्ड एक्सपोर्टले भारतबाट कपडा र कपडाजन्य मालवस्तु भन्सार चोरी पैठारी गरी भन्सारतर्फ २३ लाख ८ हजार ३६३, मूल्य अभिबृद्धि करतर्फ २८ लाख १ हजार ४८३ र आयकरतर्फ ७५ लाख १३ हजार ९५९ गरी राजस्व चुहावट गरेको अनुसन्धानबाट पुष्टि भएको विभागको भनाइ छ।
राजश्व (अनुसन्धान तथा नियन्त्रण) ऐन, २०५२ को दफा २ (छ१) राजस्व चुहावट गरेको वारदात स्थापित हुन आएकोले राजस्व चुहावट गरेको कसुरमा देवी इम्पोर्ट एण्ड एक्सपोर्ट र भगतलाई मुद्दा दायर गरिएको विभागले जनायो।