रुपन्देहीको तिलोत्तमा नगरपालिकाको नयाँमिलमा ग्यास बोकेको पिकअप गाडीले मोटरसाइकललाई ठक्कर दिँदा एकजनाको मृत्यु भएको छ। दुर्घटनामा मोटरसाइकलमा सवार दुईजना गम्भिर घाइते भएका छन्।
बेलहिया सडक खण्ड अन्तर्गत नयाँमिलमा बुटवलबाट मणिग्राम तर्फ जाँदै गरेको लु. १ च ३८२६ नं. को ग्यास सिलिण्डर बोकेको पिकअप गाडी मणिग्रामबाट बुटवलतर्फ आउँदै गरेको लु. १९ प ५३६३ नं. को मोटरसाइकलसँग ठोक्किन पुग्दा दुर्घटना भएको हो।
मुख्य सडकबाट गुडिरहेको गाडीको अकस्मात टायर पञ्चर भएपछि अनियन्त्रित भइ सर्भिस लेनमा गुडिरहेको मोटरसाइकललाई ठक्कर दिन पुगेको थियो।
पिकअपले मुख्य सडक र सर्भिसलेनलाई छुट्टयाएको फलामे रेलिङ भाँचेर सर्भिसलेनमा पुगेको थियो। दुर्घटनामा परेर पिकअप चालक असकुमार चौधरीको मृत्यु भएको जिल्ला प्रहरी कार्यालय रुपन्देहीले जनाएको छ।
घाइते हुनेमा मोटरसाईकल चालक पाल्पा तिनाउ गाउँपालिका वडा नं. १ का ४७ वर्षका कमल प्रसाद पोखरेल र पछाडि बस्ने कृष्ण खड्का छन्। उनीहरुको अवस्था पनि गम्भिर रहेको प्रहरीले जनाएको छ।
घाइते दुवै जनाको मणिग्रामस्थित क्रिमसन अस्पतालमा उपचार भइरहेको प्रहरीले जनाएको छ।
