कोरोना भाइरस संक्रमणका कारण बुधबार साँझ ललितपुरमा एक जनाको मृत्यु भएको छ। योसँगै नेपालमा कोरोनाबाट मृत्यु हुनेको संख्या पाँच पुगेको छ।
ललितपुर स्वास्थ्य कार्यालय प्रमुख डा. खगेश्वर गेलालले ललितपुरको बुंगमतीका ५७ वर्षीय पुरुषको मृत्यु भएको पुष्टि गरे।
‘आज साँझ रोग नियन्त्रण महाशाखाबाट मलाई खबर आयो। मृत्यु भएका व्यक्तिको स्वाब परीक्षण नतिजा पोजिटिभ आयो, त्यसैअनुसार शव व्यवस्थापनको तयारी गर्नुस् भनिएको छ,’ उनले सेतोपाटीसँग भने, ‘हामीले शव अस्पतालमै राखेका छौं। भोलि कार्यविधिअनुसार शव व्यवस्थापनको काम हुन्छ।’
उनका अनुसार, मृत्यु भएका व्यक्ति कलेजोका बिरामी थिए। उनी जेठ ११ गते अस्पताल भर्ना भएका हुन्। उनको स्वाब यही जेठ १२ गते परीक्षणका लागि पठाइएको थियो।
मृतकका ज्वाइँ राजीव शाक्यले मृत्यु भएको पुष्टि गरे पनि कोरोना संक्रमण पोजेटिभ देखियो भन्ने रिपोर्ट आफूहरूले नपाएको बताए।
‘हामीले आधिकारिक कागज मागेका छौं, तर दिएका छैनन्,’ उनले भने, 'उहाँ कतै बाहिर जानुभएको छैन। बिरामी मान्छेलाई कसरी कोरोना सर्यो थाहा छैन।'