पछिल्लो अढाई महिनाबीच कोशीको पहाडी जिल्ला ओखलढुंगामा हत्याका दुई फरक घटना भएका छन्।
दुई वटा फरक घटनामा दम्पत्तिसहित तीन जनाको ज्यान लिइएकोमध्ये पहिलो घटना गएको असोज २६ गते सिद्धिचरण नगरपालिकामा भएको थियो।
कोशी प्रदेश प्रहरीले दिएको जानकारी अनुसार असोज २६ गते राति करिब १० बजेतिर सिद्धिचरण नगरपालिका–४ चार्खुमा ५२ वर्षीया महिलाको हत्या भयो।
सामान्य खेती–किसानी गरेर एक्लै बस्दै आएकी रत्नकुमारी कटवाल (कार्की) लाई हतियारधारी समूहले घरमै आक्रमण गरेर हत्या गर्यो।
उनलाई बन्चरो प्रयोग गरी दाहिने कन्चट र कानको भागमा प्रहार गर्दै ज्यान लिएको समूहले त्यसपछि घरमा रहेका नगद तथा सुनका गरगहना लुटेको थियो।
ओखलढुंगाकै चिसंखुगढीमा पुस १५ गते बिहानै अर्को विभत्स हत्याकाण्ड भयो।
चिसंखुगढी गाउँपालिका–६ भदौरे गैरीगाउँमा किराना पसल सञ्चालन गर्दै आएका ६० वर्षीय शोभितमान थापा मगर र उनकी पत्नी ६० वर्षीया रत्नमाया थापामगरको धारिलो हतियार प्रहारबाट हत्या भएको हो।
यो घटना त्यस दिन बिहान करिब ८ बजेतिर भएको थियो।
कोदालो तथा अन्य हतियार प्रयोग गरी दुवै जनाको टाउकोमा आक्रमण गरिएको र पछि शव गोठमा लगेर स्याउलाले छोपिएको अवस्थामा फेला परेको थियो।
हत्यापछि किराना पसल र कोठामा राखिएको करिब एक लाख रूपैयाँ नगद तथा गरगहना र ६ तोला सुन लुटिएको थियो।
कोशी प्रदेश प्रहरी प्रवक्ता एसएसपी दीपक पोखरेलले सोमबार पत्रकारहरूलाई दिएको जानकारी अनुसार ती दुवै घटना लुटपाटको उद्देश्यबाट प्रेरित थिए र दुवै घटनामा एकै समूहको संलग्नता रहेको अनुसन्धानबाट खुलेको छ।
'हत्या गरेर लुटपाट गर्ने उद्देश्यले एउटै समूहले घटना गराएको देखिएको छ,' एसएसपी पोखरेलले भने।
यी घटनाको नेपाल प्रहरीको केन्द्रीय अनुसन्धान ब्युरो (सिआइबी), कोशी प्रदेश प्रहरी कार्यालय विराटनगर र जिल्ला प्रहरी कार्यालय ओखलढुंगाको संयुक्त टोलीले अनुसन्धान गरेको थियो।
अनुसन्धानपछि चिसंखुगढी गाउँपालिकाका चार जना पक्राउ परेका छन्।
पक्राउ पर्नेहरूमा चिसंखुगढी–३ दियालेका २८ वर्षीय मिलन भनिने संगम राई, चिसंखुगढी–४ रातमाटेका ३० वर्षीय विनोद राई, ३० वर्षीय प्रकाश भुजेल र चिसंखुगढी–८ माम्खाका ३० वर्षीय दोर्जे भनिने अशोक भुजेल छन्।
उनीहरूमाथि कर्तव्य ज्यान, डाँका तथा हातहतियार खरखजना सम्बन्धी मुद्दामा अदालतबाट म्याद थप गरी अनुसन्धान अघि बढाइएको प्रहरीले जनाएको छ।
दुवै घटनाको प्रकृति, हत्या गर्ने तरिका, प्रयोग भएका हतियार र लुटपाटको उद्देश्य समान देखिएपछि प्रहरीले शृंखलाबद्ध अपराधको आशंकामा सिआइबीसँग समन्वय गरी खोजतलास तीव्र बनाएको थियो।
सोही क्रममा पुस १७ र १८ गते विभिन्न स्थानबाट अभियुक्तहरू पक्राउ परेका हुन्।
प्रहरीले घटनामा प्रयोग गरिएका हतियार र लुटिएका सामग्री समेत बरामद गरेको छ।
चार्खु घटनास्थलबाट एक थान बन्चरो र दापसहितको खुकुरी फेला परेको छ भने रत्नकुमारीको घरबाट लुटिएको सुन पगालेर बनाइएको ५.८० ग्रामको औंठी पनि बरामद गरिएको छ।
भदौरे गैरीगाउँको घटनासँग सम्बन्धित एक सय रूपैयाँको रिचार्ज कार्ड, दुई नाल भरूवा बन्दुक र चार थान मोबाइल फोन अभियुक्तहरूको साथबाट फेला परेको प्रहरीले जनाएको छ।
यी प्रमाणले अपराध योजनाबद्ध ढंगले गरिएको पुष्टि हुने प्रहरीको निष्कर्ष छ।
पक्राउ परेकाहरू स्थानीय भूगोल र बस्तीको अवस्थासँग परिचित भएकाले अपराध गर्न सहज भएको प्रारम्भिक अनुसन्धानबाट खुलेको छ।
अभियुक्तहरू विरूद्ध मुलुकी अपराध संहिताअन्तर्गत कर्तव्य ज्यान, डाँका तथा हातहतियार खरखजना सम्बन्धी कसुरमा मुद्दा चलाइने प्रहरीले जनाएको छ।
क्रुर यातना दिई ज्यान मारेको ठहर भएमा कानुन अनुसार जन्मकैदसम्मको सजाय हुन सक्ने व्यवस्था छ।
डाँकाको कसुरमा ७ देखि १४ वर्षसम्म कैद र जरिवानाको प्रावधान छ भने अवैध हातहतियार प्रयोगमा थप सजाय हुने व्यवस्था छ।
-1746009348.jpg)
