लकडाउन खुकुलो बनाउन व्यापारीहरूले माग गरेका छन्।
काठमाडौं, भक्तपुर र ललितपुरका प्रमुख जिल्ला अधिकारीसँग बिहीबार जिल्ला समन्वय समिति काठमाडौंमा भएको छलफलमा व्यापारीहरूले पसल खोल्न दिनुपर्ने माग राखेका हुन्।
लकडाउनको समयावधि बाँकी छँदै बिहीबार न्युरोडलगायत ठाउँमा पसल खोलिएको थियो।
व्यापारीले आफूखुसी पसल खोलेपछि उपत्यकाका सिडिओ छलफलमा जुटेका हुन्।
सिडिओहरूले व्यापारीका प्रतिनिधिसँग पनि बिहीबार छलफल गरेका छन्।
स्वास्थ्य सतर्कता अपनाएर पसल खोल्ने वातावरण बनाइदिन व्यापारीले प्रशासनसँग माग गरेका हुन्।
काठमाडौंका सिडिओ जनकराज दाहालले व्यापारीबाट प्राप्त सुझावका आधारमा विभिन्न मोडल तयार पारेर लकडाउन खुकुलो बनाउन सकिने निष्पकर्षमा आफूहरू पुगेको बताए।
‘व्यवसाय सञ्चालन गर्न आवश्यक निर्देशिका तयार गरी लागू गर्न कोरोना रोकथाम तथा नियन्त्रण उच्चस्तरीय समितिलाई सिफारिसका रूपमा पठाइन्छ,’ सिडिओ दाहालले भने।
व्यापारीहरूले सिडिओहरूसँगको संयुक्त बैठकमा विहान ११ बजेदेखि साँझ ५ बजेसम्म व्यापार, व्यवसाय सञ्चालन गर्न दिनुपर्ने माग राखेका थिए।
दिन विराएर पालैपालो सबै किसिमका उद्योग, व्यवसाय तथा पसल सञ्चालनको वातावरण बनाउनुपर्ने व्यापारीको माग छ।
शिक्षण संस्था, धार्मिक स्थल, सिनेमा हल, जिमखाना, खेलकुदलगायत क्षेत्र बाहेक अरू सञ्चालन गर्नुपर्ने उनीहरूले बताए।
सामाजिक दूरी सहितको सिट व्यवस्थापन गरी जिल्लाभित्र आन्तरिक रुपमा सार्वजनिक यातायातको साधन सञ्चालन गर्ने व्यवस्था मिलाउन पनि व्यवसायीको माग छ।
छलफलमा सहभागी नेपाल चेम्बर अफ कमर्शका अध्यक्ष राजेशकाजी श्रेष्ठले लकडाउन बढ्दै जाँदा व्यापारीले पनि समस्या खेप्नुपरेको बताए।
‘कोरोना महामारीमा जीवन रक्षा मात्र नभई अर्थतन्त्र पनि चलायमान बनाउनुपर्छ,’ उनले भने, ‘व्यवस्थित ढंगले व्यापार, व्यवसाय गर्न दिनुपर्छ।’
नेपाल राष्ट्रिय व्यवसायी महासंघको आव्हानमा बिहीबार काठमाडौंमा सबै प्रकारका पसल खुलेका थिए।
