भारतीय राज्य केरलाको वन विभागले गर्भिणी हात्तीको हत्या आरोपमा दुई जनालाई पक्राउ गरेको छ।
उक्त घटनामा संलग्न भएको आरोपमा बिहीबार दुई जनालाई वन विभागले हिरासतमा लिएको टाइम्स अफ इन्डियाले जनाएको छ।
स्थानीयले प्रमनाराकादु प्रहरी चौकीमा हात्तीको हत्या भएको भन्दै उजुरी दिएका थिए।
भारतका (सच्याइएको) वातावरण, वन तथा जलवायु परिवर्तन मन्त्री प्रकाश जावेदकरले यस घटनामा संलग्नलाई कडा कारबाही गर्ने बताएका छन्।
जनावरमाथि मान्छेको क्रुरता: नदीमा सुँड डुबाएर मरी गर्भिणी हात्ती
गत बुधबार भारतको केरलामा एक गर्भिणी हात्ती पानीमा सुँड डुबाएर उभिइरहेको अवस्थामा मरी।
हात्ती कुनै रोग वा दुर्घटनामा परेर मरेकी होइन। मानव-जनावर द्वन्द्वमा मानिसले देखाएको क्रुरताको पराकाष्ठाले उसको ज्यान लिएको हो।
स्थानीयले उक्त हात्तीलाई भित्र विस्फोटक पदार्थ हालेर भुइँकटहर खुवाएका थिए। केही भुइँकटहर हात्तीको मुखमै पड्किएका थिए, केही भित्र गए।
वन अधिकारीहरूले उक्त हात्तीबारे जानकारी सामाजिक सञ्जालमा राखेपछि उसमाथि क्रुरता बाहिर आएको हो।
अन्दाजी १४-१५ वर्षकी जंगली हात्ती पालाक्कड जिल्लाको साइलेन्ट भ्यालीको जंगल छोडेर खानाको खोजीमा नजिकैको गाउँमा पुगेको थिई। त्यही बेला कसैले उसलाई बिस्फोटक पदार्थ भरेर भुइँकटहर दिएको वन अधिकारीहरूको भनाइ छ।
त्यहाँका स्थानीयले भालुबाट आफ्नो बाली जोगाउन यसरी भुइँकटहरमा बिस्फोटक पदार्थ राख्ने पहिलादेखि नै गर्दै आएका छन्।
‘उसले सबैलाई विश्वास गरी। जतिबेला उसले खाएका भुइँकटहरहरू पड्किन थाले सायद ऊ आफ्नाबारे होइन १८-२० महिनामा आफूले जन्म दिन लागेको बच्चाकाबारे सोचेर दुखित भई होली,’ वन अधिकारी मोहन क्रिसनले फेसबुकमा लेखेका छन्।
क्रिसन उक्त हात्तीको उद्धारका लागि बनाएको र्यापिड रेस्पोन्स टिममा पनि थिए।
उसको मुखमै पड्किएको भुइँकटहरभित्र निकै शक्तिशाली बिस्फोटक पदार्थ रहेछ। त्यसले उसको जीब्रो र बंगरामा घाउ बनाएको छ।
भुइँकटहर पड्किन थालेपछि पीडा सहन नसकेर हात्ती गाउँभरि डुली। मुखमै घाउ भएकाले उसले केही खान पनि सकेकी थिइन।
‘छटपटाउँदै गाउँभरि हिँड्दा पनि उसले कसैलाई आक्रमण गरिन, कसैको घरमा भत्काइन। मलाई लाग्छ ऊ ज्ञानी थिई,’ क्रिसनले हात्तीको तस्बिर राख्दै फेसबुकमा लेखेका छन्।
पछि हात्ती भेलियार नदीमा गई र पानीमै उभिई। हात्ती नदीमा सुँड र मुख डुबाएर उभिएको तस्बिरहरूमा देखिन्छ। नदीमा यसरी ऊ तीन दिनसम्म उभिइरही। यसो गर्दा शरीरभित्रको उसको जलन अलि कम हुन्थ्यो होला। वन अधिकारीहरूले मुखको घाउमा आउने झिँगा र अरू किरा हटाउन पनि उसले सुँड डुबाएको हुन सक्ने बताएका छन्।
पछि वन अधिकारीहरूले सुरेन्द्रन र नीलकण्ठ नाम दिइएका दुई घर पालुवा हात्तीलाई ल्याएर उसलाई नदीबाट निकाल्न खोजेका थिए। उनीहरू हात्तीको शल्यक्रिया गर्न चाहन्थे।
‘सायद उसलाई आफू मर्छु भन्ने थाहा थियो होला। हामीलाई केही गर्न दिइन,’ क्रिसनले लेखेका छन्।
वन अधिकारीहरूले उद्धारका लागि घन्टौं गरेको प्रयासका बावजुद् मे २७ को दिउँसो ४ बजे उसले प्राण त्यागी।
त्यसपछि वन अधिकारीहरूले उसको मृत शरीरलाई ट्रकमा राखेर जंगलमा ल्याए। जंगलमै उनीहरूले उसको शव जलाए।
‘उसले पाउन योग्य अन्तिम संस्कार दिनु जरूरी थियो। त्यही भएर हामीले उसलाई लोरीमा राखेर जंगल ल्यायौं। उसले खेले र हुर्केबढेको ठाउँमा चिता बनायौं। उसको पोष्टमर्टम गरेका डाक्टरहरूले मलाई भनेअनुसार उसको पेटमा बच्चा थियो। मास्क लगाएकाले उनको अनुहार देख्न नपाए पनि मैले ती डाक्टरको विक्षिप्तता महशुस गरें। हामीले झुकेर उसको चितामा हाम्रो अन्तिम सम्मान दर्शायौं,’ एक जना वन अधिकारीले भने।
