प्रहरी प्रधान कार्यालय, नक्सालमा कोरोनाभाइरस संक्रमित प्रहरीको संख्या एक सय पुगेको छ।
आइतबार थप १० जनामा संक्रमण देखिएपछि कुल संक्रमित संख्या एक सय पुगेको केन्द्रीय प्रवक्ता एसएसपी कुवेर कडायतले जानकारी दिए।
‘आजसम्म कुल संक्रमित संख्या एक सय पुगेको हो,’ एसएसपी कडायतले सेतोपाटीसँग भने, ‘हेडक्वाटर भित्रका विभिन्न काममा कार्यरत प्रहरीमा संक्रमण देखिएको हो।’
संक्रमितहरूलाई काठमाडौंको बलम्बुस्थित सशस्त्र अस्पताल, कीर्तिपुरको आइसोलेसन सेन्टर लगायत विभिन्न ठाउँमा पठाइएको छ।
नेपाल प्रहरीमा अहिलेसम्म दुई सय दुई जनामा संक्रमण भइसकेको छ। ती मध्ये एक सय ४९ जना निको भइसकेका छन्।
प्रहरी प्रधान कार्यालयमा पहिले चार जनामा ज्वरो देखिएपछि कोरोना परीक्षण गराइएको थियो। त्यसपछि कन्ट्याक ट्रेसिङमार्फत थप प्रहरीमा परीक्षण गर्दा संक्रमण पुष्टि भएको हो।