बैतडीमा बलात्कारको घटना मिलापत्र गराउन खोज्ने वडा अध्यक्ष सहित ६ जना पक्राउ परेका छन्।
पीडित किशोरीलाई एक तोला सुन दिने सर्तमा तमसुक बनाएर मिलाउन खोजेको घटनामा नाम जोडिएपछि सिगास गाउँपालिका–३ का वडाध्यक्ष शेरसिंह साउद पक्राउ परेका हुन्।
उनीसहित अरु ३ जनालाई पनि पक्राउ गरिएको प्रहरीले जनाएको छ।
जिल्ला प्रहरी कार्यालय बैतडीका प्रहरी नायव उपरीक्षक नारायण प्रसाद अधिकारीका अनुसार उनीहरुमाथि थप अनुसन्धान भइरहेको छ।
मिलापत्र गराउन बनेको तमसुकमा साक्षी बसेका राजेन्द्र धामी, नरेन्द्र धामी र गोपाल धामी पनि पक्राउ परेका छन्। यस्तै आरोपीले सुन नदिए आफूहरुले दिनेगरी जिम्मा लिएका मनोजसिंह धामी र अमर धामीलाई प्रहरीले त्यसअघि नै पक्राउ गरिसकेको थियो।
बलात्कार गरेको आरोप लागेका दिपकसिंह धामी भने अहिलेसम्म फरार रहेको डिएसपी अधिकारीले बताए।
स्थानीय दिपकसिंहले गएको जेठ २३ गते बलात्कार गरेको आरोपसहित १८ वर्षीया किशारीले प्रहरीसमक्ष बिहीबार उजुरी दिएकी थिइन्।
त्यसैका आधारमा अनुसन्धान गर्दै जाँदा मिलापत्र गर्न बनाइएको तमसुक बाहिरिएपछि प्रहरीले उनीहरुलाई नियन्त्रणमा लिएको हो।