रौतहटका एसपी सिद्धिविक्रम शाहमाथि छानबिन हुने भएको छ।
रौतहटमा एक निर्दोष पत्रकारलाई फसाएको आरोपमा उनीमाथि पनि प्रश्न उब्जिएपछि प्रहरी प्रधान कार्यालयले छानबिन गर्न लागेको हो।
‘अहिले जुन कुराहरू उठेका छन, त्यसमा प्रहरी प्रधान कार्यालयले छानबिन गर्छ,’ प्रहरी प्रवक्ता बसन्त कुँवरले सेतोपाटीसँग भने।
एउटा विवादित अडिओ सार्वजनिक भएपछि एसपी शाहमाथि छानबिन हुने भएको हो।
यसअघि जिल्ला प्रहरी कार्यालय रौतहटले निर्दोष व्यक्तिलाई लागुऔषध मुद्दामा फसाइएको भन्दै दुई जनालाई पक्राउ गरेको थियो।
माधवनारायण १ बस्ने वर्ष २४ का धिरज यादव र सर्लाही रामनगर गाउँपालिका वडा नं.१ बहुअर्वा बस्ने वर्ष २३ का जितेशकुमार यादवलाई पक्राउ गरिएको प्रहरीले जनाएको छ।
यो घटनामा पत्रकार महासंघ रौतहटका सहसचिव संजय सहनी मुख्य योजनाकार रहेको देखिएको प्रहरीले जनाएको थियो। उनीहरूले प्रहरी नै प्रयोग गरेर निर्दोष व्यक्तिलाई पक्राउ गरेको प्रहरीको निष्कर्ष छ।
गत साउन ३२ गते प्रहरीले लागुऔषधसहित पत्रकार मोहम्मद मोजिबुल्लाहलाई पक्राउ गरेको थियो। नेपाल पत्रकार महासंघ जिल्ला शाखा रौतहटका सहसचिव संजय सहनीले यादवद्वयलाई प्रयोग गरी मोहम्मद मोजिबुल्लाह चढ्ने मोटरसाइकलमा लागुऔषध राख्न लगाएको खुलेको एसपी शाहले बताएका थिए।
उनीहरूले सई उदय प्रसाद यादव र जवान मनोज साह कानुलाई बोलाई कुराकानी गरी पक्राउ गर्न लगाएको खुल्न आएको प्रहरीले जनाएको छ।
'पत्रकार मोजिबुल्लाह र सहनीबीच व्यवसायिक इबी रहेछ। त्यसैले सहनीले मोजिबुल्लाहलाई फसाउन खोजेको हाम्रो अनुसन्धानले देखायो', एसपी शाहले भने,‘सहनीलाई नियन्त्रणमा लिन अदालतबाट पक्राउ पुर्जी जारी भइसकेको छ।’
धिरज यादव र जितेश कुमार यादवलाई अपराधिक षडयन्त्र लागुऔषध मुद्दामा जिल्ला अदालतबाट ७ दिनको म्याद लिई अनुसन्धान अगाडि बढाएको प्रहरीले बताएको छ।
रौतहटका एसपी शाहले भने त्यो अडियो आफ्नै भएको र बाहिर सोचेजस्तो नभएको तर्क गरेका छन्।
‘मैले काम भएपछि जसले मलाई सूचना दिएको थियो, त्यो मान्छेलाई नै मैले काम भयो भनेर धन्यवाद दिएको हुँ,’ शाहले भने।
प्रहरीले जोसँग पनि सूचना संकलन गर्न पाउँछ र काम भएपछि धन्यवाद दिन पाउने उनले तर्क गरे।
.JPG)
