ललितपुर महानगरपालिले जथाभावी सवारी पार्किङ निषेध गरेको छ।
महानगरलाई सवारी जामरहित अभियान अनुसार महानगरपालिकाले अव्यवस्थित रूपमा जथाभावी सवारीसाधन पार्किङ गर्नेलाई सचेत गराएर ‘ठाउँको ठाउँ’ जरीवाना तिराउँदै आएको छ।
पछिल्लो १ महिनादेखि सुरू गरेको अभियान सफल भएको र यसलाई निरन्तरता दिने महानगरपालिकाले जनाएको छ।
अनधिकृत रूपमा पार्किङ गरिएका सवारीलाई पार्किङ स्थलबाट उठाएर अर्को ठाउँमा जरीवाना तिराउँदा सर्वसाधारणले थप झन्झट बेहोर्नुपर्ने निष्कर्ष निकाल्दै महानगरले ठाउँको ठाउँ जरीवाना गराएर सचेत गराउने र सवारी धनि नभेटिएका सवारीलाई मात्र महानगरपालिकाले उठाउने गरेको छ।
ललितपुर महानगर भित्र जथाभावी पार्किङ गरेर हिँड्नै असहज हुने गरी सहर कुरूप बनाएकोले त्यसलाई नियन्त्रण गर्न यस्तो अभियान सुरू गरिएको नगर प्रमुख चिरीबाबु महर्जनले बताए।
अनधिकृत पार्किङको जरीवाना गर्ने अधिकार महानगरपालिकालाई हुने भन्दै महर्जनले आफूहरूले ट्राफिक प्रहरीको सहकार्यमा नगर प्रहरी लगाएर कारबाही र सचेतना प्रक्रियालाई तीव्रता दिएको जानकारी दिए।
नगर प्रहरीले महानगरीय ट्राफिक प्रहरी महाशाखासँगको सहकार्यमा ललितपुर महानगर भित्रका सबै क्षेत्रको फुटपाथ र नो पार्किङ राखिएका स्थानमा पार्किङ गर्ने सवारी साधनलाई ‘ह्वील लक’ गर्ने र जरीवाना तिराएर मात्र छोड्ने गरेको छ।
‘नो पार्किङ र फुटपाथमा पार्किङ गरी पैदल यात्रु र अन्य सवारीलाई असर गरेका मोटरसाइकल तथा स्कुटर र चार पाङ्ग्रे सवारीलाई कारबाही प्रक्रिया अगाडि बढाएका हौं,’ नगर प्रहरी प्रमुख सिताराम हाथेछुले सेतोपाटीसँग भने, ‘हामीले यसको अवलोकन र कारवाहीका लागि महिला नगर प्रहरीलाई तालिम दिएर परिचालन गरेका छौं। उहाँहरूले कारबाही गरि जरीवाना ठाउँको ठाउँ गर्नुहुन्छ।’
जथाभावी पार्किङ गरेर छोडेका सवारी साधनलाई कारबाही स्वरूप ‘ह्वील लक’ गर्ने र सवारीमा ‘निषेधित क्षेत्रमा सवारी पार्क गरिरहेकाले तपाईंको सवारी लक गरिएको छ’ भनेर सूचनासमेत दिने गरेको छ।
उपत्यकामा हुने अत्यधिक जामलाई व्यवस्थित पार्न र अनधिकृत पार्किङ निरूत्साहित गर्न उक्त सवारी साधनलाई कारबाही गर्दै सचेत गराइएको हाथेछुले बताए।
महानगरपालिका अनुसार हालसम्म १५ सय भन्दा बढी मोटरसाइकल र ७९ वटा चार पाङ्ग्रे सवारीलाई जरीवाना गराएको छ।
पूर्व ट्राफिक प्रहरी निरीक्षकसमेत रहेका हाछेथुलाई प्रहरी महानिरीक्षक शैलेश थापा क्षेत्रीले गर्दै आएको कामका लागि बधाई दिँदै जनताको मन जित्ने काम गर्न सुझाव दिए।
‘ललितपुर महानगर प्रहरीको काम उत्ष्ट छ, हामी प्रहरीलाई नै केही हदसम्म सघाएको छ। छुट्टै पोशाक मात्र होइन काम पनि फरक छ। महानगरलाई आवश्यक परेको सल्लाह दिन नेपाल प्रहरी तयार छ’, क्षेत्रीले हाछेथुको प्रशंसा गर्दै भने।
यसैबीच महानगरपालिकाले सडकमा बिग्रिएर सडक जाम हुने गरि बसेका सवारीलाई त्यहाँबाट हटाएर ग्यारेजसम्म पुर्याइदिने भएको छ।
महानगरपालिकाले हालै दुई वटा अत्याधुनिक गाडी उठाउने सवारीमार्फत लामो समयदेखि सडकमै बिग्रिएर बसेका र दुर्घटनामा परि गुड्न नसक्ने भएका सवारीलाई उठाएर सम्बन्धित स्थानमा पुर्याइदिने भएको हो।
‘हामीले सडकमा बिग्रिएर बसेका वा दुर्घटनामा परि गुड्न नसक्ने भएका सवारीलाई त्यहाँबाट ग्यारेज या सम्बन्धित ठाउँसम्म पुर्याइदिन्छौ’, हाछेथुले भने, ‘बिग्रिएका सवारी बेलैमा नहटाउँदा सडक जाम हुने भएकाले त्यो नियन्त्रणमा लागि हामीले यस्तो अभियान सुरू गरेका हौ।’
उनले यदि कसैको गाडी बिच बाटोमै बिग्रिएर गुड्न नसक्ने भएमा महानगरलाई सम्झनसमेत आग्रह गरे।
‘यदि कसैको गाडी बिग्रिएर वा दुर्घटनामा परेर गुड्न नसक्ने भएको छ भने ललितपुर महानगरलाई खबर गर्नुहोस् हामी सम्बन्धित ठाउँसम्म पुर्याइदिन्छौ’, उनले भने।
यस्तै ललितपुर महानगरलाई स्वच्छ बनाउने अभियान अन्तर्गत ललितपुर मापदण्ड विपरित घरभन्दा बाहिर राखिएका ट्रस, सेड (पाली) समेत महानगरपालिकाले हटाउन सुरू गरेको छ।
घाम र पानी छेक्नका लागि पसल सञ्चालकहरूले त्यस्तो पाली बनाउँदै आएका छन्। मापदण्ड विपरित भएको भन्दै महानगरले त्यस्ता पालि हटाउन थालेको हो।
अनावश्यक ट्रसका कारण शहरको सौन्दर्यमा ह्रास आएको र हुरी बतास आउँदा सेड खसेर पैदल यात्रुलाई लागेर दुर्घटना हुने सम्भावना हुने ललितपुर महानगरको निष्कर्ष छ।
स्थायी संरचना नभत्काउने र स्वीकृत नक्साबाहेक थप गरिएका ट्रसहरु मात्र निकाल्न थालिएको नगर प्रहरी प्रमुख हाछेथुले बताए । ‘घर धनीहरुले भाडामा दिएपछि पसल सञ्चालकले त्यस्तो पाली राखेको र त्यसबाट घरको स्वरुप बिग्रिएको गुनासो पनि गर्नुभएको छ,’ उनले भने,‘हाम्रो यो कामलाई स्थानीयले पुरा साथ दिनु भएको छ। आफैं हटाउन नसक्नेहरूलाई महानगरले हटाउन सहयोग गररहेको छ।’
ट्रस हटाउनका लागि महानगरले केही दिनको समय दिएर पत्र पठाउने गरेको छ।
‘महानगरको पत्र बुझेका ७० प्रतिशतले आफैंले निकालेका छन् । केही पसल सञ्चालहरुले दुई दिन थप समय मागेका छन्’, उनले भने, ‘हाम्रो अभियानलाई नगरवासीले साथ दिनुभएको छ।’
यस्तै पछिल्लो समय कोरोना भारइरसको नयाँ भेरियन्ट ओमिक्रोन संक्रमण तिब्र रूपमा फैलिएपछि महानगरले सतर्कता र सचेतना अभियान सुरू गरेको छ।
महानगर भित्रका ऐतिहासिक सम्पदा, सपिङ मल, सार्वजनिक स्थानमा मास्क अनिवार्य गरेको छ। विश्व सम्पदा सूचीमा सूचीकृत ललितपुर महानगरपालिका-१६ स्थित ऐतिहासिक पाटन दरबार परिसरमा बिना मास्क प्रवेश निषेध गरिएको छ।
यस्तै सडकमा मास्क नलगाएका व्यक्तिलाई बोलाएर कोरोनाको ख्याल गर्न र जनस्वास्थ्यका मापदण्ड पालना गर्न सुझाव दिने गरेको महानगरपालिकाले जानकारी दिएको छ।
कोरोना संक्रमणलाई अन्त्य गर्न जनस्वास्थ्यका मापदण्ड पालनामा महानगर सधैं सचेत रहेको नगर प्रमुख चिरिबाबु महर्जनले बताए।
सचेतना अभियान अन्तर्गत ललितपुर नगर प्रहरीले सचेतना जगाउने प्लेकार्ड र माइकिङसहित अभियान सुरू गरेको छ।
‘कोभिड-१९ का अन्य भेरियन्ट जस्तै ओमिक्रोनको संक्रमणबाट बच्न पनि मास्कको सही प्रयोग गर्ने, भौतिक दूरी कायम गर्ने, बेलाबेलामा साबुनपानीले हात धुने वा स्यानिटाइजर प्रयोग गर्ने, भिडभाड नगर्ने, हावा आवतजावत राम्रो हुने स्थानमा बस्ने लगायतका सबै जनस्वास्थ्यका मापदण्डहरूको कडाइपूर्वक पालना गर्नुपर्छ र कोभिड-१९ विरुद्धको खोप लगाउनुपर्छ’, महर्जनले भने,‘यसका लागि महानगर सधैं तयार छ।’
कोरोनाबाट सिर्जना हुन सक्ने समस्या र चुनौतीलाई दृष्टिगत गर्दै महानगरले संक्रमण रोक्न तोकिएको सुरक्षा मापदण्डलाई दुरुस्तरुपमा कार्यान्वयनका लागि ‘संक्रमणबाट आफू बचौँ र अरुलाई पनि बचाऔँ’ नारासहित अभियान सञ्चालन गरेको हो।
1642385494.jpg)
-1746009348.jpg)
