बीमाको २ करोड ५० लाख रुपैयाँ रकम हत्याउन नक्कली विवाह गरी एक युवकको दुर्घटना गराई हत्या गरेको आरोपमा प्रहरीले ६ जनालाई पक्राउ गरेको छ।
प्रहरीले सोमबार र बुधबार नेपालका विभिन्न स्थानबाट बीमा गराई ठगी गरेको आरोपमा ६ जनालाई पक्राउ गरेको केन्द्रीय अनुसन्धान ब्युरोका प्रहरी उपरीक्षक श्याम कुमार महतोले जानकारी दिए।
पक्राउ पर्नेमा बाँकेका २१ वर्षीया सपना मल्ल, ३२ वर्षीय सरदार अहमद खाँ र ३३ वर्षीय टोप बाहदुर राना क्षेत्री रहेका छन्।
यस्तै, बाँकेका ३८ वर्षीय दीपक केसी, २१ वर्षीया ललिता सापकोटा र स्याङ्जाका ३१ वर्षीय सन्जीव अर्याल छन्।
प्रहरी उपरीक्षक महतोका अनुसार कोहलपुर नगरपालिका-११ का २१ वर्षीय सर्जन विकको सडक दुर्घटनाको क्रममा मृत्यु भएको थियो। दुर्घटना २०७८ वैशाख २ गते बैजनाथ गाउँपालिका-६ मा भएको थियो।
मृतक सर्जनको रिलायन्स लाइफ इन्स्योरेन्स कोहलपुरमा बीमा गरिएको थियो। बीमा कम्पनीमा दुई करोड पचास लाख रुपैयाँको बीमा गरिएको प्रहरीले जनाएको छ। उनको बीमा एजेन्ट सरदार जो घटनाका मुख्य योजनाकार सन्जीवको साथी भएको प्रहरीले जनाएको छ।
प्रहरीका अनुसार सन्जीव बीमा गर्ने एजेन्टको रूपमा काम गर्ने गर्थे। उनैले मृतक सर्जनको पनि बीमा गराएका थिए। दुर्घटना भएको दिन मृतक सर्जन सन्जीवसँग मोटरसाइकलमा राति ११ बजे घर फर्कंदै थिए।
घटनाक्रम अनुसार उनीहरूले बीमाको पैसा लिनकै लागि योजना बनाई दुर्घटना गराएको आरोप छ। नियतबस दुर्घटना गराएका टिपर चालक टोप बहादुर क्षेत्रीलाई जिल्ला अदालतले २०७८ माघ २५ गते ३० दिन कैद र दुई हजार जरिवाना फैसला सुनाएको थियो।
उनको मृत्युपश्चात् सर्जनकी श्रीमती सपनाले बीमा रकम दाबी गरी २०७८ साउन १४ गते भुक्तानी लिएकी थिइन्।
सपनाले बीमा भुक्तानीबापत् दुई करोड ४२ लाख रुपैयाँ भुक्तानी लिएको प्रहरी उपरीक्षक महतोले जानकारी दिए।
उनका अनुसार नेपाल पुन:बीमा कम्पनीले मृत्यु शंकास्पद देखिएका कारण घटनाको सत्यतथ्य विवरणको अनुसन्धान गरी पाउँ भनी केन्द्रीय अनुसन्धान ब्युरोमा पत्राचार गरेको थियो।
सोही अनुरूप अनुसन्धान गर्ने क्रममा सर्जनको आर्थिक अवस्था अनुसारको बीमा नभएको खुलेको हो।
‘उनले केवाइसीमा वार्षिक आम्दानी नै दुई लाख भएको स्वघोषणा गरेका छन्,’ उनले भने।
दुई लाख वार्षिक आम्दानी भएको मानिसले वार्षिक पाँच लाख ४० हजार तिर्न नसक्ने प्रहरीले बताएको छ।
‘बीमा प्रावधानमा नै आय स्रोतको ४० प्रतिशतको मात्रै बीमा गर्न पाउने नियम रहेको छ,’ उनले भने, ‘यो काम प्रावधान अनुरूप छैन। मृतकको ठूलो रकमको बीमा गर्नुपर्ने कुनै कारण र आधार पनि देखिएको छैन।’
२०७७ साल मंसिर २७ गते सीप सिक्न काठमाडौं आएकी सपनाको ललितासँग भेट भएको थियो।
भेटका क्रममा ललिताले डिपेन्डेन्ट भिसामा बाहिर जाँदा राम्रो हुने सुझाएकी थिइन्। सोही क्रममा ललिताले सपना र सर्जनको डिपेन्डेन्ट भिसामा अस्ट्रेलिया जान भेट गराएको प्रहरीले जनाएको छ।
ललिता एजेन्टको रूपमा काम गर्थिन्। उनले अस्ट्रेलिया जानको लागि कागजी विवाह गराउने र साथै सम्पूर्ण प्रक्रियाको आफैंले गर्ने खुलेको प्रहरीले जनाएको छ।
‘ललिताले एक एजेन्टको रूपमा काम गरेको देखिएको छ’, प्रहरी उपरीक्षक महतोले भने, ‘उनले मानिसको आवश्यकता अनुरूप नै काम गर्ने खुलेको छ।’
प्रहरीले २०७७ फागुन २८ गते डिपेन्डेन्टमा जान विवाह दर्ता गर्न गएको तर उमेर नपुगेका कारण चैत २ गते पुन: विवाह गर्न गएको जनाएको छ। सोही क्रममा पहिलोपटक सपनाको भेट सर्जनसँग भएको प्रहरीले जनाएको छ।
विवाह दर्ता गरेपछि सर्जन र सपनाको भेट समेत नभएको खुलेको प्रहरीले जनाएको छ।
प्रहरीका अनुसार सपना र सन्जीव प्रेमी-प्रेमिका भएको खुलेको छ।
सर्जनको मृत्यु भएको कुरा पनि सपनालाई थाहा नभएको र उक्त सबै कुराको जानकारी सन्जीवले नै सपनालाई गराएको प्रहरी उपरीक्षक महतोले बताए।
सपनाले बीमा भुक्तानी गर्न बैंक खाता खोल्नेदेखि लिएर सबै काम उनले गरेको प्रहरीले जनाएको छ। खाता खोल्दा उपलब्ध गराएको फोन नम्बर समेत सन्जीवकै नाममा दर्ता भएको प्रहरीले जनाएको छ।
प्रहरीका अनुसार सन्जीवले सपनालाई प्रलोभनमा पारी सर्जनसँग विवाह गराउने काम गरेको प्रहरीले जनाएको छ। उनले बीमाबापतको ८० लाख रकम समेत लिएको प्रहरीले जनाएको छ।
प्रहरीका अनुसार बीमा रकम भुक्तानी भएपछि दिपक केसीले ६० लाख रुपैयाँ, छवि (सपनाकी आमा) ले १७ लाख ४६ हजार रुपैयाँ, सपनाले ८६ लाख ८९ हजार रुपैयाँ बाँडफाँट गरेको देखिएको छ।
यस्तै, उनीहरूले ३ लाख तीन हजार एटिएमबाट चलाएको, दुई लाख ६९ हजार ९८० पिओएस र ब्यालेन्स रिचार्चमा ५ हजार ३१६ खर्च गरेको खुलेको छ।
प्रहरीले घटनामाथि थप अनुसन्धान गरिरहेको जनाएको छ।
