धनुषामा अंश विवाद हुँदा गोली हानेर मिथिला बिहारी नगरपालिकाका–९ नम्बर वडाध्यक्ष विन्देश्वर यादवको हत्या भएको छ।
शुक्रबार साँझ ६ बजेतिर तारापट्टी भन्ने ठाउँमा गोली चलेको मधेस प्रदेशका डिआइजी गोविन्द थपलियाले जानकारी दिए।
उनका अनुसार गोली लाग्दा यादवको मृत्यु भएको हो। यादवको छातीमा गोली लागेको छ।
'घर परिवारको लामो समयदेखिको अंश विवाद रहेछ। त्यही विषयमा दाजुभाइबीच झगडा हुँदा गोली चलेको हो,' उनले भने।
प्रहरीले उनका आफन्त रामवरण यादवसहित दुई जनालाई नियन्त्रणमा लिएको छ।
अरू दुई जनामध्ये एक जना प्रहरी शम्भु यादव छन्। शम्भु बिदामा आएका थिए। उनीमाथि स्थानीयले आरोप लगाएपछि प्रहरीले पक्राउ गरेको हो।
गोली हान्न कटुवा पेस्तोलको प्रयोग भएको प्रहरीले जनाएको छ।
अरूमाथि पनि प्रहरीले अनुसन्धान गरिरहेको छ।
गोली चल्दा अरू केहीलाई सामान्य चोट लागेको छ।
-1746009348.jpg)
