भक्तपुरको खरिपाटी होल्डिङ सेन्टरमा बसिरहेकी ३० वर्षीया बबिता घिसिङको छोराको उपचारका लागि सरकारले प्रक्रिया अघि बढाएको जनाएको छ।
बबिताकी ५ वर्षीया छोरा सक्षमको घाँटीमा पाइप राखिएको छ। उनी त्यही पाइपको सहाराले सास फेर्छन्। यसबारे सेतोपाटीले बिहीबार स्टोरी प्रकाशन गरेको थियो। (पढ्नुहोस्: 'मेरो छोराको घाँटीबाट पाइप हटाइदिनुस्, मलाई अरू केही चाहिँदैन')
प्रधानमन्त्री बालेन शाहकी प्रेस तथा अनुसन्धान विज्ञ दीपा दाहालले सुकुम्बासीहरूलाई भक्तपुर होल्डिङ सेन्टरमा लगेर राखेको केही दिनमै बिरामीहरूको तथ्यांक संकलन गरेर उपचार प्रक्रिया अघि बढाएको जानकारी दिइन्।
'सक्षमको उपचार प्रक्रिया अघि बढाइएको छ,' उनले भनिन्, 'उपचारका लागि टिचिङ र कान्ति अस्पतालसँग परामर्श गरिरहेका छौं।'
उनका अनुसार सरकारले होल्डिङ सेन्टरमा राखिएका बालबालिकाहरूको स्वास्थ्य परीक्षण गरेको थियो। त्यसमा सामान्यदेखि जटिल बिरामीहरूको समेत उपचार प्रक्रिया थालनी गरिएको दाहालले बताइन्।
स्वास्थ्य परीक्षणपछि उनीहरूमा देखिएको रोग उपचार गर्न सम्बन्धित चिकित्सकहरूसँग सहकार्य गर्ने तयारी भइरहेको उनी बताउँछिन्।
'सरकारले कुनै पनि बालबालिका र बिरामीहरूलाई बेवास्ता गरेको छैन,' उनले भनिन्, 'होल्डिङ सेन्टरमा राखिएको बेलादेखि नै उपचार प्रक्रिया अघि बढाइएको छ।'
