रुपन्देही पल्टन्सलाई १० विकेटले पछाडि पार्दै बुटवल युनाइटेड तिलोत्तमा प्रिमियर लिगको सेमिफाइनलमा प्रवेश गरेको छ।
टस जितेर ब्याटिङ गरेको रुपन्देही पल्टन्सलाई १२ दशमलव ३ ओभरमा १९ रनमै रोकेपछि बुटवल युनाइटेड सहज रूपमा सेमिफाइनल प्रवेश गरेको हो।
बुटवल युनाइटेडले विजयका लागि पाएको २० रनको लक्ष्य २ ओभरमै पूरा गरेको थियो। बुटवल युनाइटेडका लागि कुसल मल्लले १० र मृनल गुरुङ्गले ११ रनको योगदान गरे।
रुपन्देही पल्टन्सलाई झिनो रनमा रोक्न बुटवल युनाइटेडका अमित तामाङ एक्लैले ५ विकेट लिए। अमितले ४ ओभरमा एक मेडन ओभर खेल्दै १० रन खर्चेर ५ विकेट लिएका हुन्। त्यस्तै, राहुल प्रजापतिले २ तथा भिम सार्की, सागर ढकाल र सुसन भारीले समान १/१ विकेट लिए।
ब्याटिङतर्फ रुपन्देही पल्टनसका विराट भण्डारी, दिनेश मगर, दिलिप कुर्मी, रोविन क्षेत्री र सौरव भूर्तेलले खाता नै खोल्न सकेनन्।
प्रतियोगितामा बुटवल युनाइटेडका अमित तामाङ म्यान अफ द म्याच बने भने राहुल प्रजापति मष्ट भ्यालुएवल खेलाडी बन्न सफल भए।
सेमिफाइनल खेल्ने सबै टिमको टुंगो लाग्यो
तिलोत्तमा प्रिमियर लिगमा सेमिफाइनल खेल्ने सबै टिमको टुंगो लागेको छ।
पोल ए मा रहेको ज्ञानोदय गोल्डसले सेमिफाइनलमा स्थान सुरक्षित बनाइसकेको छ भने आजको खेलको विजेता बुटवल युनाइटेड पनि पोल ए बाट सेमिफाइनल पुग्ने अर्को टिम बनेको छ।
पोल बि बाट मणिग्राम किंग्स् र पाल्पाली लिजेन्टस् यसअघि नै सेमिफाइनल प्रवेश गरिसकेका छन्।
तिलोत्तमा नगरपालिका वडानम्बर ६ स्थित नवजीवन क्लबको खेल मैदान नयाँमिल १० नम्बरमा जारी प्रतियोगितामा प्रथम हुने टिमले नगद ४ लाख प्राप्त गर्नेछ भने उपविजेता हुने टिमले नगद २ लाख प्राप्त गर्नेछ।
-1746009348.jpg)
