फुटबलको मौसम चलिरहेको छ। विश्वकप पछिको सबैभन्दा ठूलो फुटबल मेला कोपा अमेरिका र युरो कप जारी छ। फेरि पनि रोनाल्डो र मेसीको चर्चा चुलिएको छ।
विश्व फुटबलका यी दुई महान हस्तीको चर्चा हुनु सामान्य हो। तर पछिल्लो समय विश्व फुटबलमा केही उदीयमान खेलाडीको जन्म भइसकेको छ। यसमध्ये एक यस्ता खेलाडी छन् जो मैदानको मध्य भागमा दौडिरहेका हुन्छन्। बल छक्याइरहेका हुन्छन्। उनको नाम हो एनगोलो कान्टे।
उनलाई थकाइ पनि नलागेको देखेर फुटबल पारखीहरू भन्छन्- कान्टे फुटबलका मेसिन हुन्। विपक्षी टिमका लागि 'राक्षस' हुन्।
लण्डन क्लब चेल्सीलाई भर्खरै युरोपियन च्याम्पियन्स लिगको उपाधि दिलाएका कान्टे फ्रान्सका प्रमुख खेलाडी हुन्।
सन् १९९१ मार्च २९ मा फ्रान्सको पेरिसस्थित रुइल माल्माइसन बस्तीमा कान्टे जन्मिएका थिए। यो बस्तीमा दैनिक रोजीरोटीका लागि मजदुरी गर्नेको बाहुल्यता थियो। कान्टेका बाबुआमा मालीबाट काम खोज्दै ८० को दशकमा यहाँ आएका थिए। परिवारमा कान्टे जेठो छोरा थिए। यसपछि यो दम्पतीका अन्य तीन सन्तान जन्मिए।
बाबुआमाका जेठा छोरा भएकाले भाइ र बहिनीलाई हेर्नुपर्ने थप जिम्मेवारी कान्टेको काँधमा थियो। कान्टे परिवारको आर्थिक ढाडस बन्न काम खोज्दै जाँदा कवाडी बटुल्न थाले। कवाडी जम्मा गरेर बचेको समय भने उनी फुटबल खेल्थे।
आफू ११ वर्षको उमेर हुँदा बाबुलाई गुमाए। जिम्मेवारी अझै बढ्यो। कवाडी जम्मा गरेर मात्रै परिवारको आवश्यकता पूरा गर्न निकै कठिन थियो, विकल्प निकै कम थिए। स्वभाव कडा मेहनत गर्ने खालको थियो त्यसैले कवाडी बटुल्नुका साथै बार तथा क्याफेमा काम गर्न थाले।
टेलिभिजनका स्क्रिनमा घरिघरि फुटबल हेर्ने गर्थे। जिदान, हेनरी, भियरा, लिलियम थुराम र निकोलस अनेल्कामा आफ्नो अनुहार देख्न थाले। यी सबै खेलाडीको पृष्ठभूमि आप्रवासी थियो जसले कान्टेको दिमागमा फुटबलमा सबैका लागि ठाउँ छ भन्ने अनुभव भयो।
पछि उनी स्थानीय क्लबमा फुटबल खेल्न थाले। ‘होचो कदको फुच्चे कसरी फुटबलमा टिक्न सक्छस्?’ भन्ने प्रश्न आफ्नो वरिपरिका मान्छेले गर्थे। कान्टे कठोर मेहनत साथ अभ्यासमा खटिरहे र यसको परिणामसमेत देखिन थाल्यो।
स्थानीय क्लबका लागि केही ट्रफी जितेपछि उनलाई थप जिम्मेवारी दिइयो। चार वर्ष एकेडेमीमा बिताएपछि उनलाई बालबालिकालाई प्रशिक्षण गराउने जिम्मेवारी दिइएको थियो। यसका लागि उनले अतिरिक्त समय दिनुपर्ने थियो र केही पैसा पनि आउँथ्यो। तत्कालीन म्यानेजर पिर्रे भिल्लेले यस्तो अवसर जुराइदिएका थिए।
सन् २०१० मा फ्रान्सको तेस्रो डिभिजन क्लब ब्लोनमा छानिएपछि उनको जीवनमै नयाँ मोड आयो। सन् २०१३ मा दोस्रो डिभिजनको कानमा गए। दोस्रो डिभिजनको कानलाई तेस्रो स्थान दिलाएर लिग वानमा छनोट गराउन सफल कान्टे त्यसपछि भने इङ्लिस क्लब लेस्टर सिटीमा आवद्ध भए।
लेस्टर सिटीले प्रिमियर लिग टाइटल जित्यो। ८० लाख युरोमा लेस्टरमा आवद्ध कान्टे अर्को सिजन लण्डन क्लब चेल्सीमा आवद्ध भए। ३ करोड २० लाख पाउण्डमा चेल्सी छिरेका कान्टेले चेल्सीमा सबै उपाधि जिते- प्रिमियर लिग, एफए कप, युरोपा लिग अनि युरोपियन च्याम्पियन्स लिग।
‘म युरोपको ठूलो क्लबमा आवद्ध भएकोमा धेरै खुसी छु। मेरो सपना साकार भएको छ। अब म क्लबको सपनालाई साकार पार्नेछु,’ चेल्सीसँगको सम्झौतापछि कान्टेले भनेका थिए। लण्डन क्लबका लागि १ सय ५७ खेल खेलिसकेका कान्टे वर्तमान क्लबको सफलताका मजबुत आधार हुन् भन्दा फरक पर्दैन।
सन् २०१६ देखि राष्ट्रिय टिममा खेलिरहेका कान्टे मैदानमा धेरै दुरी कभर गर्न, छोटा र लामा पास निकाल्न अनि ट्याकल गर्न माहिर छन्। विश्वकप २०१८ मा उनले सबै खेल खेले। फ्रान्सले विश्वकप नै जित्यो। मैदानको चारैतिर भाग्न सक्ने क्षमताका कान्टे यतिवेला युरोकपको संग्राममा छन्।
सन् १९९८ मा फ्रान्सले विश्वकप जित्दा कान्टे ८ वर्षका थिए। मैदानबाहिर बियर र पानीका बोतल उठाउँदा पाइने पैसामा उनी दंग पर्थे। तर तिनै कान्टे आज विश्वविजेता टोलीको नियमित सदस्य बनेका छन्।
अब उनको हातमा केवल एउटा पदकको अभाव देखिन्छ, युरो कप। युरो कपको सबैभन्दा प्रबल दाबेदार फ्रान्स ग्रुप अफ डेथमा छ। त्यसो त फ्रान्सेली टिममा एकसे एक खेलाडी छन्। फ्रान्स युरो कपको च्याम्पियन बन्न सक्छ। तत्पश्चात् विजयको ट्रफी कान्टेको हातमा अझ सुन्दर देखिने छ।
एजेन्सीको सहयोगमा