नेपाल सुपर लिग (एनएसएल) ले पोखरा थन्डर्स एफसीका दुई अफिसियलाई प्रतिबन्ध लगाउने निर्णय गरेको छ।
ललितपुर सिटीविरूद्ध बुधबार दशरथ रंगशालामा भएको खेलमा अनुशासनहिन काम गरेको भन्दै अफिसियलद्वय सुन्दर थापा र दीपक श्रेष्ठलाई प्रतिबन्ध लगाउने निर्णय गरेको हो।
सुन्दर थापालाई एनएसएल २०२५ को बाँकी सबै खेलका लागि रंगशालामा प्रतिबन्ध लगाइएको छ। उनलाई प्रतिबन्धित क्षेत्रमा प्रवेश गरेको र रेफ्री तथा प्रतियोगिता निर्देशकमाथि अनुचित व्यवहार गरेको आरोप लगाइएको छ।
यस्तै दीपक श्रेष्ठलाई डगआउट क्षेत्रमा आक्रामक भएको र हिंसात्मक आचरण प्रदर्शन गरेकोमा २ खेल प्रतिबन्ध लगाइएको छ।
यसैगरी पोखरा थन्डर्सलाई अनुशासन र खेल भावनाको मापदण्ड पालना गर्न असफल भएको भन्दै ५० हजार रूपैयाँ जरिवाना गरिएको छ।
खेलको ८०औं मिनेटमा पोखराका नवयुग श्रेष्ठको हेडर क्रसबारमा लागेर फर्किएको देखिएको थियो। सो बल ललितपुरका गोलकिपर बाल्टुसले फर्काउने कोसिश गर्दा जाली भित्र छिरेको जस्तै देखिएको थियो। बाल्टुसले बल फर्काउने क्रममा गोललाइनभित्र छिरेको भन्दै पोखराले विरोध गरेको थियो। जसका कारण अफिसियलले आक्रमक व्यवहार देखाउँदै रेफ्री र म्याच अफिसियललाई हातपातको प्रयास गरेका थिए।
खेलपछि पोखराका प्रशिक्षक सुमन श्रेष्ठले रेफ्रीको स्तरमा प्रश्न उठाउँदै रेफ्रीको निर्णयमा असन्तुष्टि पोखेका थिए।
-1743684831.jpg)
-1742801159.jpg)
