अमेरिकाको एटलान्टामा फिफा क्लब विश्वकपअन्तर्गत सोमबार इंग्लिस क्लब चेल्सी र अमेरिकी क्लब लस एन्जलस एफसीबीच प्रतिस्पर्धा भयो। तर खेल रंगशालाका हजारौं खाली सिटहरूका बीच सम्पन्न भयो।
७१ हजार बढी दर्शक क्षमता भएको मर्सिडिज-बेन्ज स्टेडियममा जम्मा २२ हजार १ सय ३७ दर्शक मात्र उपस्थित थिए, जसले गर्दा स्टेडियम खाली जस्तै देखिन्थ्यो।
फिफाको महत्वाकांक्षी कार्यक्रमको रुपमा रहेको क्लब विश्वकपमा आकर्षण नहुनुमा विभिन्न कारण रहेको बिबिसी स्पोर्ट्सले औल्याएको छ।
जसमा कार्यालय खुल्ने दिन सोमबार दिउँसो ३ बजे सुरु हुनुलाई एउटा कारण भनिएको छ। यस्तै टिकटको मूल्य निकै महँगो हुँदा सामान्य फ्यानहरूलाई आकर्षित गर्न नसकेको अर्को कारण बताइएको छ।
नयाँ ढाँचाको क्लब विश्वकप प्रतियोगिता अमेरिकी फ्यानका लागि अपरिचित र कम महत्त्वको हुनु तथा फिफाले प्रतियोगिताको प्रचारप्रसारमा ध्यान नदिएको र मानिसहरू आफैं आउने अपेक्षा गरेको आरोप लगाइएको छ।
धेरै फ्यानहरूले अर्को वर्ष हुने फिफा विश्वकपका लागि पैसा बचत गरिरहेको हुनसक्ने अनुमान छ।
फिफाका लागि यो विषय एउटा ‘लज्जास्पद’ सुरुवात मानिएको छ। कुनै पनि प्रतियोगिता सफल बनाउन नाम मात्र पर्याप्त हुँदैन, सही समय, उचित टिकट मूल्य र प्रभावकारी प्रचारप्रसार पनि आवश्यक हुनु पर्ने बताइएको छ।
यद्यपी यो समस्या प्रतियोगिताका सबै खेलमा भने देखिएको छैन। पिएसजी र एट्लेटिको मड्रिड वा बोका जुनियर्स र बेन्फिकाबीचको खेलमा दर्शकको उपस्थिति निकै राम्रो थियो।
विश्लेषकहरूका अनुसार कम उपस्थिति क्लब विश्वकपप्रतिको सहभागी क्लब तथा फ्यानकै उदासीनताका कारण पनि हो।
सन् २०२६ को फिफा विश्वकपमा यस्तो अवस्था आउने हो कि भनेर अहिले चिन्ता हुन थालेको छ। त्यसैले फिफाका लागि एउटा ठूलो चेतावनी भएको र अर्को वर्ष हुने विश्वकपका लागि टिकटको मूल्य निर्धारण गर्दा र खेलको समयतालिका बनाउँदा निकै होसियार हुनु पर्ने देखिएको छ।
