दक्षिण एसियाली फुटबल महासंघ (साफ) ले पहिलो पटक आयोजना गरेको साफ महिला क्लब च्याम्पियनसिपको शनिबार फाइनल भिडन्त हुँदैछ।
त्रिपुरेश्वरस्थित दशरथ रंगशालाम हुने फाइनलमा भिडन्तमा नेपालको लिग च्याम्पियन सशस्त्र प्रहरी बलको नेपाल एपिएफ क्लब र भारतको लिग च्याम्पियन इस्ट बंगाल एफसीबीच प्रतिस्पर्धा हुँदैछ।
साझ पाँच बजेदेखि हुने फाइनल भिडन्त जुन टोलीले जिते पनि नयाँ इतिहास लेखिनेछ। किनभने पहिलो पटक साफले महिला क्लब च्याम्पियन पाउनेछ। साफ क्षेत्रमा महिला फुटबल विकासमा यो एउटा कोशेढुंगा समेत सावित हुनेछ।
यो संस्करणको साफमा पाँच टोलीले भाग लिएका थिए। नेपालको एपिएफ र भारतको इस्ट बंगालसहित भुटानको ट्रान्सपोर्ट युनाइटेड, पाकिस्तानको कराँची सिटी र बंगलादेशका नशरिनले भाग लिएका थिए।
जसमा एपिएफ र इस्ट बंगाल लिग चरणमा अपराजित रहँदै फाइनल खेल्न लागेका हुन्। एपिएफले भुटानी क्लब र इस्ट बंगालसँग बराबरी खेल्दा कराँची र नशरिनलाई पराजित गरेको थियो। इस्ट बंगालले भने एपिएफ बाहेक अरु सबै टोलीलाई हराएर शीर्ष स्थान हासिल गर्यो।
अपराजित रहुनु बाहेक फाइनल खेल्न लागेका दुवै टोलीको अर्को विशेषता भनेको दुवै टोलीले अहिलेसम्म गोल खाएका छैनन्। तर गोल गर्नमा भने इस्ट बंगाल अघि छ। उसले कुनै गोल नखादा १३ गोल गरेको छ। गोल नखाएको एपिएफले भने ५ गोल गरेको छ।
एपिएफमा नेपालका राष्ट्रिय खेलाडीको बाहुल्यता छ। गोलकिपर अन्जना रानामगरदेखि कप्तान अनिता बस्नेत, रेनुका नगरकोटे, अनिता केसी, हिराकुमारी भुजेल, सरु लिम्बू, निशा थोकर, मिना देउवा, रश्मिकुमारी घिसिङ टोलीमा छन्।
-1746009348.jpg)
