अखिल नेपाल फुटबल संघ (एन्फा) को नयाँ कार्यसमितिका लागि आगामी माघ २८ गते निर्वाचन गर्ने प्रस्ताव गरिएको छ।
एन्फाको जारी कार्यसमिति बैठकमा अध्यक्ष पंकजबिक्रम नेम्बाङले नयाँ नेतृत्वका लागि माघ अन्तिम साता निर्वाचन गर्ने प्रस्ताव गरेको बैठकमा सहभागी एक सदस्यले सेतोपाटीलाई जानकारी दिए।
यो कार्यसमितिको कार्यकाल आगामी असार ६ गतेसम्म छ। एन्फा विधानमा कार्यसमितिको कार्यकाल चार वर्ष हुने व्यवस्था छ।
विधानमा कार्यकालअघि नै निर्वाचन गर्न सकिने विषयमा केही उल्लेख गरिएको छैन।
यद्यपी एएफसीको सहमतिमा विशेष परिस्थितिमा ६ महिना कार्यकाल भने थप्ने परम्परा छ।
यो कार्यसमितिको कार्यकाल समाप्त हुने मितिमा फिफा विश्वकप फुटबल प्रतियोगिता २०२६ हुँदैछ। यहि कारण देखाउँदै एन्फा अध्यक्ष नेम्बाङले कार्यकाल सकिनुअघि नै निर्वाचनको प्रस्ताव गरेका हुन्।
नयाँ निर्वाचन हुँदा जिल्ला र प्रदेशको कार्यकाल भने सकिएको हुँदैन। कतिपय जिल्लामा नयाँ नेतृत्व आउने भएकाले भोटिङ ‘प्याट्रन’ मा समेत असर गर्ने देखिएपछि एन्फाले अहिले नै निर्वाचन गर्न लागेको भन्दै आलोचना भएको छ।
कार्यसमिति बैठकमा निर्वाचन (साधारण सभा) बाहेक लेखा परिक्षक नियुक्ती र विविध विषयमा छलफल भइरहेको छ।
-1746009348.jpg)
