अफ्रिका कप अफ नेशन्समा खराब प्रदर्शन गर्दै बाहिरिएपछि गेबोन सरकारले आफ्नो राष्ट्रिय फुटबल टोलीमाथि कडा कारबाही गरेको छ।
गेबोनका खेलकुद मन्त्री सिम्प्लिस-डेसिरे माम्बुलाले राष्ट्रिय टोलीलाई अर्को सूचना नभएसम्मका लागि निलम्बन गर्ने घोषणा गरेका छन्। साथै, टोलीका मुख्य प्रशिक्षक थियरी मुयुमालाई बर्खास्त गरेका छन्।
सरकारले टोलीका चर्चित स्ट्राइकर पिएरे-इमेरिक ओवामेयाङ र अर्का खेलाडी ब्रुनो एक्युले माङ्गालाई राष्ट्रिय टोलीबाट प्रतिबन्ध गरेको छ।
डिसेम्बर ३१ मा भएको खेलमा आइभोरी कोस्टसँग ३-२ ले पराजित भएपछि सरकारले यो कठोर निर्णय लिएको हो।
त्यसअघि गेबोनले क्यामरुन र मोजाम्बिकसँग पनि हारेको थियो। मोरक्कोमा भएको यस प्रतियोगितामा गेबोन आफ्नो समूहको सबैभन्दा पुछारमा रह्यो। खेलकुद मन्त्रीले टोलीको यो प्रदर्शनलाई ‘लज्जास्पद’ भनेका छन्।
पूर्व आर्सनल र चेल्सीका स्टार ओवामेयाङ चोटका कारण अन्तिम खेलमा मैदान उत्रिएका थिएनन्। उनी उपचारका लागि आफ्नो क्लब मार्से फर्किएका थिए। कारबाहीबारे बोल्दै उनले भनेका छन्, ‘मलाई लाग्छ टोलीको समस्या म एक व्यक्तिको कारणले मात्र होइन, यो निकै गहिरो छ।‘
फुटबलको सर्वोच्च निकाय 'फिफा' ले फुटबलमा सरकारको हस्तक्षेपलाई स्वीकार गर्दैन।
पहिले-पहिले अफ्रिकी देशहरूमा हारपछि टोली नै भंग गर्ने चलन भए पनि अचेल फिफाको कडा नियमका कारण यस्तो विरलै हुने गर्छ। गेबोन सरकारको यो कदमले गर्दा फिफाले उनीहरूलाई थप प्रतिबन्ध लगाउन सक्ने जोखिम पनि छ।
-1746009348.jpg)
