इंग्लिस क्लब म्यानचेस्टर युनाइटेडले आफ्ना मुख्य प्रशिक्षक रुबेन एमोरिमलाई पदबाट हटाएको छ। क्लबले यस सिजनको बाँकी समयका लागि 'केयरटेकर' (अस्थायी) प्रशिक्षक नियुक्त गर्ने तयारी गरेको छ।
बुधबार हुने बर्नलीविरुद्धको प्रिमियर लिग खेलमा क्लबका पूर्व खेलाडी ड्यारेन फ्लेचरले टोलीको जिम्मेवारी सम्हाल्नेछन्।
अर्को अस्थायी प्रशिक्षक नभेटिएसम्म फ्लेचर नै पदमा रहनेछन् भने क्लबले आउँदो गर्मीयाम (समर) मा मात्रै स्थायी प्रशिक्षक नियुक्त गर्ने योजना बनाएको छ।
गएको शुक्रबार एमोरिम र क्लबका फुटबल निर्देशक जेसन विल्कोक्सबीच निकै चर्काचर्की भएको थियो। उल्भ्ससँगको खेल (१-१ को बराबरी) मा एमोरिमले अपनाएको रणनीति र टिमको फर्मेसनलाई लिएर विल्कोक्सले टिप्पणी गरेका थिए, जुन कुरा ४० वर्षका एमोरिमलाई मन परेन।
त्यसको लगत्तै भएको पत्रकार सम्मेलनमा एमोरिमले क्लबका हाकिमहरूसँग आफ्नो सम्बन्ध बिग्रिएको संकेत गरेका थिए। उनले आफूले चाहेजस्तो नयाँ खेलाडी किन्न बजेट नपाउने आशंका समेत व्यक्त गरे।
आइतबार लिड्ससँगको खेल पनि १-१ को बराबरीमा सकिएपछि एमोरिमले क्लबका उच्च अधिकारीहरूलाई फेरि घोचपेच गरे। उनले आफू 'कोच' (प्रशिक्षण मात्र दिने) नभई 'म्यानेजर' (शक्तिशाली व्यवस्थापक) भएर काम गर्न चाहेको र आफ्नो सम्झौता सकिएपछि १८ महिनामा क्लब छाड्न तयार रहेको बताए।
यो बयान दिएको २४ घण्टा पनि नबित्दै क्लबले उनलाई बिदाइ गरेको घोषणा गर्यो। एमोरिमले युनाइटेडमा जम्मा १४ महिना बिताए।
युनाइटेडले जारी गरेको विज्ञप्तिमा भनिएको छ, 'अहिले प्रिमियर लिगमा क्लब छैटौँ स्थानमा छ। टोलीको नतिजा सुधार्न र अझ राम्रो स्थानमा पुग्नका लागि अहिले नै परिवर्तन गर्नु सही हुने निष्कर्षमा हामी पुगेका छौँ। रुबेनले क्लबका लागि पुर्याएको योगदानका लागि धन्यवाद।'
एमोरिमसँगै उनको कोचिङ टोलीले पनि क्लब छाडेको छ।
सन् २०२४ नोभेम्बरमा पोर्चुगिज क्लब स्पोर्टिङबाट करिब साढे ९ मिलियन पाउण्ड तिरेर उनलाई युनाइटेड ल्याइएको थियो। क्लबका मालिक सर जिम र्याटक्लिफले उनलाई ३ वर्षको समय दिने बताएका थिए। तर, क्लबले यस सिजनमा टोलीमा कुनै सुधार नदेखिएको महसुस गर्यो।
एमोरिमले सम्हालेका ६३ खेलमध्ये युनाइटेडले २५ वटा मात्र जित्यो। सन् २०१४ मा डेभिड मोयसलाई ८ महिनामै निकालिएपछि एमोरिम नै सबैभन्दा छोटो समय युनाइटेड टिकेका स्थायी प्रशिक्षक बनेका छन्।
अहिले जिम्मेवारी पाएका ४१ वर्षीय फ्लेचर युनाइटेडका पूर्व भेट्रान खेलाडी हुन्। उनले युनाइटेडबाट खेल्दा पाँच पटक प्रिमियर लिग र एक पटक च्याम्पियन्स लिग जितेका थिए। हाल उनी क्लबको १८ वर्षमुनिको टोलीका प्रशिक्षक थिए। उनले यसअघि कहिल्यै कुनै मुख्य टोलीको प्रशिक्षक भएर काम गरेका छैनन्।
फ्लेचरले मंगलबार पत्रकार सम्मेलन गर्नेछन् र बुधबार बर्नलीविरुद्धको खेलमा टोलीको नेतृत्व गर्नेछन्।
-1746009348.jpg)
