लिभरपुलले घरेलु मैदान एनफिल्डमा बार्न्सलीलाई हराउँदै एफए कपको चौथो चरणमा ब्राइटनसँगको भेट पक्का गरेको छ।
लिभरपुलले पहिलो हाफमा डोमिनिक सोबोस्लाई र जेरेमी फ्रिम्पोङको उत्कृष्ट गोलमार्फत दुई गोलको अग्रता लिएको थियो। तर, सोबोस्लाईको एउटा गल्तीले लिग वानको टोली बार्न्सलीलाई खेलमा फर्कने मौका दियो।
खेलको ४०औँ मिनेटमा सोबोस्लाईले आफ्नै पेनाल्टी क्षेत्रभित्र गोलकिपर जिओर्जी मामार्दास्भिलीलाई 'ब्याकहिल' पास दिन खोज्दा चुकेका थिए।
लिभरपुलकै ठुला फ्यान रहेका आडम फिलिप्सले सोही अवसरको फाइदा उठाउँदै गोल गरेपछि ६,००० को सङ्ख्यामा रहेका बार्न्सलीका समर्थकहरू खुसीले झुमेका थिए।
दोस्रो हाफमा बार्न्सलीका रेयस क्लियरीलाई सोबोस्लाईले लडाएपछि पेनाल्टीको माग गरिएको थियो। बार्न्सलीका प्रशिक्षक कनर हाउरिहाने यसमा निकै आक्रोशित देखिएका थिए, तर एफए कपको तेस्रो चरणमा भिडियो असिस्टेन्ट रेफ्री नभएका कारण उक्त निर्णयको पुनः जाँच हुन सकेन।
खेलको अन्त्यतिर वैकल्पिक खेलाडीहरू ह्युगो एकिटिके र फ्लोरियन विर्ट्ज मिलेर लिभरपुलको तनाव कम गरे। एकिटिकेको उत्कृष्ट पासमा विर्ट्जले गोल गर्दै अग्रता बढाए भने इन्जुरी समयमा विर्ट्जकै सहयोगमा एकिटिकेले अर्को गोल थपे।
प्रशिक्षक स्लटले खेलअघि भनेजस्तै टोलीमा धेरै ठुलो परिवर्तन गरेनन्। युवा खेलाडी रियो नगुमोहा र फेडेरिको चिसालाई सुरुवाती ११ मा मौका दिइएको थियो भने चोटका कारण पछिल्ला दुई खेल गुमाएका एकिटिके दोस्रो हाफमा मैदान छिरेका थिए।
लिगको श्रेणीमा दुई टोलीबीच ५७ स्थानको अन्तर भए पनि बार्न्सलीले खेलको सुरुवातमै कडा चुनौती दिएको थियो। पहिलो मिनेटमै डेभिस केइलर-डनको हेडर क्रसबारमा लागेको थियो।
सोबोस्लाईले पेनाल्टी बक्स बाहिरबाट उत्कृष्ट प्रहार गर्दै बार्न्सलीका गोलकिपर मर्फी कुपरलाई कुनै मौका नदिई लिभरपुललाई अग्रता दिलाएका थिए। ३६औँ मिनेटमा फ्रिम्पोङले बायाँ खुट्टाले प्रहार गर्दै लिभरपुलको अग्रता दोब्बर बनाए, तर खेल आफ्नो नियन्त्रणमा आउनै लाग्दा सोबोस्लाईले बिर्सनलायक गल्ती गरे।
भाग्यवश, हङ्गेरियन खेलाडी सोबोस्लाईको त्यो गल्ती लिभरपुलका लागि घातक बनेन। यसअघि सन् १९९७ र २००८ मा एनफिल्डमा बार्न्सलीसँग पराजित भएको लिभरपुलले यो जितसँगै आफ्नो अपराजित यात्रालाई ११ खेलसम्म पुर्याएको छ।
-1746009348.jpg)
