एन्टोनी सेमेन्यो र रायन चर्कीले गोल गरेपछि म्यानचेस्टर सिटीले काराबाओ कपको सेमिफाइनलको पहिलो लेगमा साविक विजेता न्यूकासल युनाइटेड विरुद्ध २-० गोलको जित निकाल्दै बलियो पकड जमाएको छ।
सेमेन्यो एक हप्ताअघि मात्र ६ करोड ५० लाख पाउण्डमा बर्नमाउथबाट सिटी आएका हुन्, तर उनले क्लबमा आउने बित्तिकै ठूलो प्रभाव पारिसकेका छन्।
गत हप्ता एक्सेटर सिटी विरुद्धको १०-१ को ऐतिहासिक जितमा एक गोल र एक असिस्ट गरेका उनले सेमिफाइनल जस्तो महत्त्वपूर्ण खेलमा पनि ओपनिङ गोल गरे।
जेरेमी डोकूको क्रसलाई बर्नार्डो सिल्भाले पास मिलाइदिएपछि सेमेन्योले पोस्टको नजिकैबाट बललाई जाली चुमाएका थिए। उनले खेलमा अर्को एक गोल पनि गरेका थिए, जसलाई रेफ्रीले मान्यता दिएनन्।
न्यूकासलका प्रशिक्षक एडी हाउले सेमेन्यो यो खेल खेल्न योग्य भएकोमा असन्तुष्टि व्यक्त गरे। नियम परिवर्तनका कारण सेमेन्योले यसअघि बर्नमाउथबाट यही प्रतियोगिता खेलिसकेको भए तापनि सिटीबाट खेल्न पाएका हुन्।
खेलको इन्जुरी समयमा वैकल्पिक खेलाडीका रूपमा मैदान छिरेका रायन चर्कीले गोल गरेपछि सिटीको जित पक्का भएको थियो।
न्यूकासलका लागि भने यो खेल अभागी सावित भयो। खेल गोलरहित बराबरीमा हुँदा न्यूकासलका दुईवटा प्रहार पोस्टमा लागेर फर्किएका थिए। योआने विसाको हेडरलाई सिटीका गोलकिपर जेम्स ट्राफोर्डले उत्कृष्ट बचाउ गर्दै क्रसबार माथि पठाएका थिए भने लगत्तै कप्तान ब्रुनो गुइमारेसको प्रहार पनि पोस्टमा लागेर बाहिरिएको थियो। विसाले खेलको सुरुवातमै गोल गर्ने सुन्दर अवसर गुमाएका थिए।
यो जितसँगै ८ पटकको विजेता म्यानचेस्टर सिटीले फाइनल पुग्ने सम्भावना बलियो बनाएको छ। अब फेब्रुअरी ४ मा सिटीको आफ्नै मैदान (इतिहाद स्टेडियम) मा दोस्रो लेगको खेल हुनेछ।
-1746009348.jpg)
