गोलकिपर रोबर्ट सान्चेजको गल्तीले गर्दा चेल्सीले आर्सनलविरुद्धको काराबाओ कप सेमिफाइनलको पहिलो लेगमा ३-२ को हार बेहोरेको छ।
हारका बावजुद अलेजान्ड्रो गार्नाचोले दुई गोल गरेपछि चेल्सीको फाइनल पुग्ने आशा भने कायमै छ।
खेलको सातौं मिनेटमा आर्सनलका डेक्लान राइसको कर्नर बललाई गोलकिपर सान्चेजले ठम्याउन सकेनन्। यसैको फाइदा उठाउँदै बेन ह्वाइटले नजिकैबाट हेडिङ गरी आर्सनललाई १-० को अग्रता दिलाए।
दोस्रो हाफ सुरु भएको केही समयमै सान्चेजको हातबाट बल चिप्लिएपछि आर्सनलका भिक्टर ग्योकेरेसले गोल गर्दै टोलीको अग्रता २-० बनाए।
५७ औं मिनेटमा मैदान प्रवेश गरेका गार्नाचोले पेड्रो नेटोको क्रसमा गोल गर्दै चेल्सीलाई खेलमा फर्काउने प्रयास गरे।
तर, आर्सनलका मार्टिन जुबिमेन्डीले चेल्सीका डिफेन्डरहरूलाई छक्याउँदै उत्कृष्ट गोल गरेर आर्सनललाई फेरि ३-१ को बलियो स्थितिमा पुर्याए।
खेलको अन्त्यतिर केपा अरिजाबालागाले क्लियर गरेको बल सिधै गार्नाचोको खुट्टामा पुग्यो र उनले उत्कृष्ट भली प्रहार गर्दै आफ्नो व्यक्तिगत दोस्रो गोल गरे।
चेल्सीले अब फाइनलमा पुग्नको लागि फेब्रुअरी ३ मा आर्सनलको मैदान (एमिरेट्स स्टेडियम) मा हुने दोस्रो लेगमा यो एक गोलको अन्तरलाई उल्टाउनु पर्नेछ। यस खेलको विजेताले फाइनलमा न्युकासल वा म्यानचेस्टर सिटीसँग खेल्नेछ।
आर्सनल हाल निकै राम्रो लयमा छ र पछिल्लो १० खेलमा अपराजित रहेको छ। उनीहरूले यस सिजन कर्नर र सेट-पिसबाट मात्र २४ गोल गरिसकेका छन्। अर्कोतर्फ, नयाँ प्रशिक्षक लियाम रोजेनियरको नेतृत्वमा रहेको चेल्सीले पछिल्ला १३ खेलमध्ये ३ वटा मात्र जित्न सकेको छ। रोजेनियरको लागि चेल्सीको प्रशिक्षकका रूपमा यो पहिलो घरेलु खेल थियो।
-1746009348.jpg)
