आयोजक मोरक्कोले नाइजेरियालाई पेनाल्टी सुटआउटमा ४–२ ले हराउँदै २०२५ को अफ्रिका कप अफ नेसन्सको फाइनलमा आफ्नो स्थान सुरक्षित गरेको छ।
रबातमा भएको तनावपूर्ण खेलमा निर्धारित समयमा गोल हुन नसकेपछि खेल पेनाल्टीमा गएको थियो। मोरक्कोका गोलरक्षक यासिन बोनोले नाइजेरियाका स्यामुएल चुकुवेजे र ब्रुनो ओन्येमाचीको प्रहार बचाए पछि युसुफ एन-नेसिरीले निर्णायक पेनाल्टी गोल गर्दै टोलीलाई जित दिलाए।
खेलको सुरुदेखि नै दुवै टोलीले गोल गर्ने खासै अवसरहरू सिर्जना गर्न सकेनन्। प्रतियोगिताका सर्वाधिक गोलकर्ता ब्राहिम डियाजले खेलको आधा घण्टाअघि गोल गर्ने सुनौलो मौका गुमाएका थिए। नाइजेरियाका स्टार फरवार्ड भिक्टर ओसिमहेन र एडेमोला लुकम्यानले पनि मोरक्कोको रक्षापंक्ति तोड्न सकेनन्।
यो जितसँगै मोरक्को सन् २००४ पछि पहिलो पटक फाइनलमा पुगेको छ। उसले सन् १९७६ पछि पहिलो पटक यो उपाधि जित्ने लक्ष्य राखेको छ।
पहिलो सेमिफाइनलमा सेनेगलले इजिप्टलाई १–० ले हराउँदै फाइनलमा स्थान बनाएको थियो।
सेनेगलका लागि साडियो मानेले खेलको ७८ औं मिनेटमा बक्सबाहिरबाट उत्कृष्ट गोल गर्दै टोलीलाई जित दिलाए। यो जितसँगै मानेले फेरि एकपटक आफ्ना लिभरपुलका पुराना साथी मोहमद सलाहलाई ठूलो प्रतियोगितामा पराजित गरेका छन्।
इजिप्टका कप्तान मोहमद सलाहले यस प्रतियोगितामा चार गोल गरे तापनि सेमिफाइनलमा उनी खासै जम्न सकेनन्।
खेलको अन्तिम समयमा ओमार मार्मुसको प्रहारलाई सेनेगलका गोलरक्षक एडुआर्ड मेन्डीले बचाउनुबाहेक इजिप्टले सेनेगललाई खासै दबाब दिन सकेन।
अब उपाधिका लागि मोरक्को र सेनेगल आइतबार नेपाली समय अनुसार रातीको १२:४५ बजे भिड्नेछन्। सेनेगलका लागि भने एउटा चिन्ताको विषय छ— उसका कप्तान कालिदु कुलिबाली र मिडफिल्डर हबिब डियाराले प्रतिबन्धका कारण फाइनल खेल खेल्न पाउने छैनन्।
-1746009348.jpg)
