महाराजगञ्जस्थित एक्सपर्ट एजुकेसन एन्ड भिसा सर्भिसेजले नेपालको ए डिभिजन फुटबल टोली श्री भागवती क्लबलाई मुख्य प्रायोजकको रुपमा सम्झौता गरेको छ।
एक्सपर्ट एजुकेसनका निर्देशक जयराम अर्याल र श्री भागवती क्लबका अध्यक्ष गणेशलाल श्रेष्ठबीच समझौतापत्रमा हस्ताक्षर गरेका छन्।
एक वर्षका समझौताअनुसार श्री भागवती क्लबले राष्ट्रिय लिगलगायत सबै प्रतियोगितामा एक्सपर्ट एजुकेसनको लोगो आफ्नो जर्सीमा राख्नेछ। अब क्लबको पूर्ण नाम एक्सपर्ट एजुकेसन टोखा नगरपालिका श्री भागवती रहनेछ।
जारी राष्ट्रिय लिगमा श्री भागवतीले यसअघिदेखि नै एक्सपर्टको लोगो प्रयोग गर्दै आएको छ।
श्री भागवती क्लब यसै वर्ष ए डिभिजन लिगमा बढुवा भएको नयाँ टोली हो। समारोहमा बोल्दै एक्सपर्ट एजुकेसनका निर्देशक जयराम अर्यालले विगतदेखि नै श्री भागवतीसँग सहकार्य गर्दै आएकोमा अब मुख्य प्रायोजक बनेर अझ फराकिलो रूपमा जोडिन पाउँदा खुसी व्यक्त गरे।
उनले खेलकुदमा जात, धर्म नभनी सबैलाई समेट्ने बताउँदै खेलाडीहरूलाई थप मेहनत गर्न प्रेरित गरे र निरन्तर सहयोगको प्रतिबद्धता जनाए।
श्री भागवती क्लबका अध्यक्ष गणेशलाल श्रेष्ठले प्रायोजनका लागि एक्सपर्टलाई धन्यवाद ज्ञापन गर्दै २०४७ सालमा टोखामा क्लब स्थापना भएको स्मरण गरे।
उनले टोलीलाई ए डिभिजनमा पुर्याउन टोखा नगरपालिका र सबै वडाको महत्वपूर्ण सहयोग रहेको उल्लेख गरे। क्लबका कप्तान अशोक खवासले एक्सपर्टबाट प्राप्त हौसला र साथका लागि आभार प्रकट गर्दै समर्थकहरूको आशा पूरा गर्न र क्लबको सकारात्मक परिचय बनाउन पूर्ण प्रतिबद्धता व्यक्त गरे।
यसैगरी श्री भागवतीका पूर्व अध्यक्ष तथा अखिल नेपाल फुटबल संघ (एन्फा) केन्द्रीय सदस्य मनिष जोशीले यो सम्झौतालाई खेलकुद र शिक्षाको सुन्दर सहकार्यको रूपमा व्याख्या गरे। उनले बी डिभिजनदेखि नै एक्सपर्टको सहयोग रहेको स्मरण गरे।
-1746009348.jpg)
