पोर्चुगिज फुटबल सुपरस्टार क्रिस्टियानो रोनाल्डोले आफू साउदी अरबको क्लब अल-नासरमा निकै खुसी रहेको र क्लबमै रहने बताएका छन्।
पछिल्लो समय उनी क्लबसँग असन्तुष्ट रहेको र क्लब छाड्न सक्ने हल्ला चलेपछि ४१ वर्षीय रोनाल्डोको यो भनाइ आएको हो।
साउदी अरबको 'पब्लिक इन्भेस्टमेन्ट फन्ड' ले क्लब चलाएको तरिकामा चित्त नबुझेका कारण उनले पछिल्ला तीनवटा खेल नखेलेको चर्चा चलेको थियो। तर, गत शनिबार अल-हाजेम विरुद्धको खेलमा मैदान फर्किएका रोनाल्डोले दुई गोल गरे। उक्त खेलमा अल-नासर ४-० ले विजयी भई साउदी प्रो लिगको शीर्ष स्थानमा पुगेको छ।
खेलपछि साउदी मिडियासँग कुरा गर्दै रोनाल्डोले भने, ‘म यहाँ धेरै खुसी छु। मैले पहिले पनि धेरै पटक भनिसकेको छु, म साउदी अरबकै हिस्सा हुँ। यो देशले मलाई, मेरो परिवार र साथीभाइलाई निकै राम्रो स्वागत गरेको छ। म यहीँ बस्न चाहन्छु।’
उनले टोलीलाई लिग जिताउन आफूहरूले कडा मिहिनेत गरिरहेको र सिजनको अन्त्यसम्म दबाब कायम राख्ने पनि बताए।
रोनाल्डो सन् २०२२ डिसेम्बरमा इंग्लिस क्लब म्यानचेस्टर युनाइटेड छाडेर अल-नासर आएका थिए। वार्षिक १७७ मिलियन पाउण्ड (करिब २९ अर्ब नेपाली रुपैयाँ) तलब पाउने उनी फुटबल इतिहासकै सबैभन्दा महँगा खेलाडी हुन्।
साउदी आएपछि उनले अहिलेसम्म २०२३ को 'अरब क्लब च्याम्पियन्स कप' मात्र जितेका छन्।
अहिले उनको टोली अल-हिलाल भन्दा एक अंकले अगाडि रहँदै लिगको शीर्ष स्थानमा छ भने एएफसी एसियन कपको क्वाटरफाइनलमा पनि प्रवेश गरिसकेको छ।
-1746009348.jpg)
