रियल मड्रिडका फरवार्ड भिनिसियस जुनियरले बेन्फिकाका मिडफिल्डर जियानलुका प्रेस्टियानीले आफूमाथि रङ्गभेदी दुर्व्यवहार गरेको भन्दै रेफ्रीलाई उजुरी गरेपछि च्याम्पियन्स लिगको खेलमा रङ्गभेद विरुद्धको 'प्रोटोकल' (नियम) प्रयोग गरियो।
यो घटना यी दुई टोलीबीचको प्ले-अफको पहिलो लेगको खेलमा भएको थियो।
अर्जेन्टिनाका खेलाडी प्रेस्टियानीले यो आरोप अस्वीकार गरेका छन्।
यद्यपि, युरोपेली फुटबल महासङ्घको अनुशासन समितिले पूर्ण अनुसन्धान गरिरहेकाले उनलाई एक खेलको प्रतिबन्ध लगाइएको थियो, जसका कारण उनले दोस्रो लेगको खेल खेल्न पाएनन्। अनुसन्धान सकिएपछि उनलाई थप कडा सजाय हुन सक्ने सम्भावना छ।
भिनिसियसले स्पेनमा घरेलु लिग खेल्ने क्रममा पनि लामो समयदेखि पटक-पटक यस्ता रङ्गभेदी दुर्व्यवहारहरू झेल्दै आएका छन्।
सन् २०२२ को सेप्टेम्बरमा रियल भालाडोलिड विरुद्धको खेलमा भिनिसियसमाथि रङ्गभेदी टिप्पणी गर्ने पाँच जनालाई सन् २०२५ को मे महिनामा स्पेनको अदालतले 'निलम्बित जेल सजाय' सुनाएको थियो।
स्पेनमा रङ्गभेद विरुद्धको मुद्दामा यस्तो खालको कडा फैसला भएको यो पहिलो पटक हो, जसलाई फुटबल जगतमा एक ऐतिहासिक कदम मानिएको छ।
-1746009348.jpg)
