सन् २०२६ को विश्वकप फुटबलको पूर्वसन्ध्यामा अमेरिका र इरानबीच राजनीतिक तनाव बढेको छ।
अमेरिकी राष्ट्रपति डोनल्ड ट्रम्पले इरानको ‘सुरक्षा’को कारण देखाउँदै उसले विश्वकप खेल्नु उचित नहुने बताएका छन्। इरानले सुरक्षा दिन नसक्ने हो भने आयोजक अमेरिका आफैँ प्रतियोगिताबाट बाहिरिनुपर्ने जवाफ दिएको छ।
हालै अमेरिका र इजरायलले इरानमाथि गरेको आक्रमणमा त्यहाँका सर्वोच्च नेता आयतोल्लाह अली खामेनीको मृत्यु भएपछि यी दुई देशबीच युद्धको स्थिति सिर्जना भएको छ। इरानले पनि जवाफमा इजरायल र अमेरिकी सैन्य अखडा रहेका खाडी मुलुकहरूमा मिसाइल प्रहार गरेको छ।
राष्ट्रपति ट्रम्पले सामाजिक सञ्जालमा लेख्दै भनेका छन्, ‘इरानलाई विश्वकपमा स्वागत त छ, तर उनीहरूको आफ्नै ज्यान र सुरक्षाका लागि यस पटक सहभागी हुनु उपयुक्त हुनेछैन।’
इरानको खेलकुद मन्त्रालय र फुटबल टोलीले ट्रम्पको भनाइको कडा विरोध गरेका छन्।
उनीहरूले भनेका छन्,‘विश्वकपको आयोजक फिफा हो, कुनै एउटा देश मात्र होइन। इरानले कसैको दयाले नभई आफ्नै क्षमता र मेहनतले विश्वकपमा स्थान बनाएको हो। जुन देशले खेलाडीको सुरक्षा ग्यारेन्टी गर्न सक्दैन, त्यस्तो देशलाई आयोजकबाटै हटाउनुपर्छ।’
इरानका खेलकुद मन्त्री अहमद डोन्यामलीले आफ्ना नेताको हत्या गर्ने देशमा गएर खेल्ने वातावरण नरहेको र आफ्ना खेलाडीहरू त्यहाँ सुरक्षित नहुने बताएका छन्।
इरानले अहिलेसम्म आधिकारिक रूपमा विश्वकपबाट नाम भने फिर्ता लिएको छैन। उसले कसैको दबाबमा नभई आफैँ निर्णय गर्ने बताएको छ। सन् २०२६ को विश्वकप जुन ११ बाट अमेरिका, क्यानडा र मेक्सिकोमा संयुक्त रूपमा हुँदैछ।
यदि इरान यो प्रतियोगिताबाट बाहिरियो भने उसको ठाउँमा कुन टोलीलाई राख्ने भन्ने निर्णय फिफाले गर्नेछ। तर अहिलेसम्म कुन टोलीले मौका पाउँछ भन्ने प्रष्ट भएको छैन। इरानको समूहमा बेल्जियम, न्युजिल्यान्ड र इजिप्ट रहेका छन्।
-1746009348.jpg)
