ए डिभिजन क्लब संकटा क्लबले राष्ट्रिय लिग र महिला लिग स्थगित हुँदा ठूलो आर्थिक घाटा ब्यहोर्न परेको बताएको छ।
क्लबले सोमबार पत्रकार सम्मेलन आयोजना गर्दै लिगका लागि आफूहरूले सबै प्रक्रिया पूरा गरेको बताएको हो। क्लबले पुरूषतर्फ राष्ट्रिय लिग र महिलातर्फ सहिद स्मारक महिला लिगमा भाग लिइरहेको छ।
यसअघि अध्यागमन विभागमा विदेशी खेलाडीले श्रम स्वीकृति नलिइ पर्यटक भिसामा खेलेको भन्दै उजुरी परेको थियो। उजुरीपछि विभागले अखिल नेपाल फुटबल संघ (एन्फा) लाई गैरकानुनी रूपमा खेलाडीलाई नखेलाउन भन्दै कारबाही गर्ने चेतवानी दिएपछि पुरुष र महिला दुवै लिग स्थगित भएका थिए।
संकटा क्लबले श्रम स्वीकृति लिन आफूहरूलाई कुनै समस्या नभएको बताउँदै सरकारी प्रक्रियाकै कारण ढिलाइ भएको बताएको हो।
‘हामीले विवरणसहित सबै कागजात बुझाएको तीन महिना भइसक्यो,’ संकटा क्लबका अध्यक्ष इन्द्रमान तुलाधरले भने, ‘यति धेरै लगानी गरेका क्लबले पर्यटक भिसामा खेलायो भनेर न्युज आउँदा हामीलाई साह्रै चित्त दुखेको छ।’
साथै उनले खेलाडीको श्रम स्वीकृति छिटो दिन पनि माग गरेका छन्।
‘हामीलाई छिटोभन्दा छिटो वर्क परमिट दिइओस। हामी नियमअनुसार कर तिर्छौं भन्दा न कर तिर्न पायौ न राजस्व बुझाउन पायौं। यस्तो अन्याय हुनुहुन्न भन्ने हामीले भन्न खोजेका हौँ,’ एन्फाका सिइओ समेत रहेका तुलाधरले भने, ‘लगानी हाम्रो हो। खेलकुद परिषद र खेलकुद मन्त्रालयले लिगमा लगानी गरेका छैनन् नी। कुनै पनि जिम्मेवारी नभएको निकायलाई अधिकार दिँदा नकारात्मक असर गर्यो।’
उनले श्रम स्वीकृति लिन जादा मन्त्रालयको व्यावहार नकारात्मक भएको पनि बताए।
‘श्रम स्वीकृतिको बारेमा क्लबको दोषभन्दा पनि सरकारी निकाय र प्रक्रियाको दोष रहेको हुँदा सम्बन्धित निकायसँग छिटो छिरितो तथा वान डोर प्रणालीबाट श्रम स्विकृतिको कागज निकाल्न दियो भने सजिलो हुन्छ,’ तुलाधरले भने, ‘हामीले यतिसम्म भोग्यौ कि मन्त्रालय जाँदा अपराधी जस्तो र अध्यागमन विभागमा जाँदा दोषी जस्तो व्यवहार भयो। हामी कर तिर्छौ भन्दा पनि अफ्रिकन खेलाडी ल्याउने भनेर सचिवज्यूले आपत्तिजनक शब्द बोल्नु भयो। यस्तो गैरजिम्मेवार तरिकाले नेपाली फुटबल बिग्रिएको हो।’
-1746009348.jpg)
