फ्रान्सेली टोली पेरिस सेन्ट जर्मेन (पिएसजी) ले इंग्लिस क्लब आर्सनलविरूद्ध युरोपियन च्याम्पियन्स लिगको उपाधि भिडन्तमा पेनाल्टी सुटआउटमा रोमाञ्चक जित हात पारेलगत्तै पेरिसको प्रसिद्ध चाम्स–एलिसेस क्षेत्रमा समर्थकहरूको ठूलो भीड ओइरियो। तर, यो खुसीयाली छिट्टै हिंसामा परिणत भयो।
सहरबाट प्राप्त दृश्यहरूमा प्रदर्शनकारीहरूले आगोका लप्का बालेको, सडकमा इलेक्ट्रिक बाइकहरू जलाएको र कम्तीमा एउटा पसलको सिसा फुटाएको देखिन्छ। खेलको सुरुवातमै पेरिस सेन्ट जर्मेनको रंगशाला 'पार्क दे प्रिन्स' बाहिर ठूला स्क्रिनमा खेल हेर्न जम्मा भएका समर्थक र प्रहरीबीच झडप भएको थियो।
प्रहरीका अनुसार यस उपद्रोका क्रममा ६ वटा सवारी साधन, दुईवटा व्यापारिक पसल र एउटा बस बिसौनीमा क्षति पुगेको छ। आइतबार बिहानसम्म देशभरबाट ४१६ जनालाई पक्राउ गरिएको छ, जसमध्ये २८० जना पेरिसबाटै समातिएका हुन्।
प्रहरी अधिकारी नुनेजले यस घटनामा सातजना प्रहरी घाइते भएको जानकारी दिँदै यो हिंसालाई ‘पूर्ण रूपमा अक्षम्य’ भनेका छन्।
यस घटनाप्रति टिप्पणी गर्दै दक्षिणपन्थी नेत्री मरिन ले पेनले सामाजिक सञ्जाल 'एक्स' मा आक्रोश पोखेकी छिन्। उनले लेखेकी छिन्, ‘एउटा फुटबल क्लबको जितमा दङ्गा हुने देश फ्रान्स मात्रै होला। जितको साँझमा हिंसाबाट बच्न नागरिकहरू घरभित्रै थुनिनुपर्ने अवस्था आउनु दुःखद छ।’
हिंसाका बाबजुद आइतबार दिउँसो विजेता खेलाडीहरूको सम्मानमा 'भिक्ट्री परेड' आयोजना गरिँदैछ। यो परेड आइफेल टावर नजिकैको चाम्स–दे–मार्स क्षेत्रमा हुनेछ र टोलीलाई राष्ट्रपति इमानुएल म्याक्रोनले स्वागत गर्ने कार्यक्रम रहेको छ।
