पोर्चुगिज सुपरस्टार क्रिस्टियानो रोनाल्डोले फिफाले अर्जेन्टिनालाई साथ दिएको दाबी गर्ने एक पोस्टमा प्रतिक्रिया दिएका छन्।
फिफाले लिओनल मेसीको टोली अर्जेन्टिनालाई फाइनलसम्म पुग्न मद्दत गरेको आरोप लगाइएको पोस्टमा रोनाल्डोले आफ्नो आधिकारिक इन्स्टाग्राम अकाउन्टबाट लाइक गरेका हुन्।
स्पेनिस टेलिभिजन कार्यक्रम 'एस्पेजो पुब्लिको' ले एउटा भिडियो पोस्ट गरेको थियो। उक्त भिडियोमा पत्रकार पिलर रोड्रिग्वेज लोसान्टोसले अर्जेन्टिनाको फाइनलसम्मको यात्रामाथि प्रश्न उठाएकी थिइन्। उनले भनेकी थिइन्, ‘अर्जेन्टिना त ५ खेलअघि नै बाहिरिनुपर्ने टोली थियो, तर फिफाको मद्दतले यहाँसम्म पुग्यो। फिफा यो पृथ्वीकै सबैभन्दा भ्रष्ट संस्थाहरूमध्ये एक हो।'
रोनाल्डोले उक्त पोस्ट किन 'लाइक' गरे भन्नेबारे कुनै सार्वजनिक स्पष्टीकरण दिएका छैनन्। तर उनको अकाउन्टबाट गरिएको 'लाइक' को स्क्रिनसट सामाजिक सञ्जालमा भाइरल भइरहेको छ।
साविक विजेता अर्जेन्टिनाले यस विश्वकपमा निकै उतारचढावपूर्ण यात्रा गरेको थियो। समूह चरणमा अल्जेरिया, अस्ट्रिया र जोर्डनलाई हराउँदै अर्जेन्टिना शीर्ष स्थानमा रह्यो।
नकआउट चरणमा केप भर्डे र इजिप्टलाई निकै कठिन संघर्षपछि ३-२ को नतिजाले हरायो। इजिप्ट विरुद्धको खेलमा त अर्जेन्टिना २ गोलले पछि परेको अवस्थाबाट पुनरागमन गरेको थियो।
क्वाटरफाइनलमा स्विट्जरल्याण्डलाई अतिरिक्त समयमा ३-१ ले र सेमिफाइनलमा इंग्ल्याण्डलाई २-१ ले हराउँदै अर्जेन्टिना फाइनल पुगेको थियो।
यद्यपि फाइनलमा भने स्पेनले अर्जेन्टिनालाई अतिरिक्त समयमा १-० ले पराजित गर्दै उपाधि जित्यो।
