प्रिसिजन अन्तर्गत स्टकहोममा भएको एथ्लेटिको मड्रिड विरुद्धको खेलमा १५ वर्षीय किशोर जेजे गेब्रियलले म्यानचेस्टर युनाइटेडको सिनियर टोलीबाट डेब्यू गरेका छन्।
युनाइटेडले २-१ को पुनरागमन जित दर्ता गरेको उक्त खेलमा गेब्रियलले अन्तिम ८ मिनेट मात्र खेल्ने मौका पाए। तर, एकेडेमी फुटबलमा निकै चर्चामा रहेका यी प्रतिभावान खेलाडीले सिनियर टोलीसँगको तालमेल कसरी मिलाउँछन् भन्ने कुरा धेरैका लागि चासोको विषय थियो।
मैदान छिर्ने बित्तिकै उनले पहिलो पटक बल छुँदा नै एथ्लेटिकोका अनुभवी उरुग्वेली डिफेन्डर जोसे मारिया जिमेनेजले उनलाई पछाडिबाट जोडदार ठक्कर दिएर भुइँमा पछारिदिए। केही बेर चोट लागेको ठाउँमा सुम्सुम्याए पनि गेब्रियल तुरुन्तै जुरुक्क उठे र खेल जारी राखे।
सुरुमा १० नम्बरको भूमिकामा देखिएका उनी पछि राइट साइडबाट खेल्न थालेपछि थप खुलेर खेले। खेलको क्रममा मेसन माउन्टको पास नियन्त्रण गर्न उनले केही संघर्ष गरे पनि बललाई आफ्नो नियन्त्रणमा राख्दै विपक्षीको पेनाल्टी बक्सभित्र छिरेर प्रहार गरेको एउटा प्रहार विपक्षीले रोकेका थिए।
आफ्नो उमेरका अन्य बालबालिकाहरू स्कुलको अन्तिम वर्षको तयारी र गर्मी बिदा मनाइरहेका बेला गेब्रियलले म्यानचेस्टर युनाइटेडको सिनियर टोलीबाट खेल्नु उनका लागि गर्वको क्षण थियो।
टोलीका अर्का खेलाडी लेनी योरोले गेब्रियलको प्रशंसा गर्दै भने, ‘उनी निकै राम्रो खेलाडी हुन्, अझै सिक्न र सुधार्न धेरै बाँकी छ तर उनी निकै मिहिनेती र विनम्र छन्।’
इंग्ल्यान्डमा जन्मिएका उनले इंग्ल्यान्डको यू-१५, यू-१६ र यू-१७ टोलीबाट खेलिसकेका छन्।
