विश्व फुटबलको सर्वोच्च निकाय (फिफा) का अध्यक्ष जियानी इन्फान्टिनोले बुधबार मोरक्कोमा एक उच्च स्तरीय आकस्मिक बैठक बोलाएका छन्।
फिफाको व्यापारिक र व्यावसायिक हिस्सा निजी क्षेत्रलाई बेच्ने उनको योजनाको चौतर्फी विरोध भएपछि उनी संकटमा परेका हुन्। चौतर्फी दबाबपछि उनले त्यो योजना रद्द त गरे, तर विवाद भने साम्य भएको छैन।
इन्फान्टिनोका निकै नजिक मानिने व्यक्तिहरूले नै उनको यो कदमको आलोचना गरेका छन्। आर्सनलका पूर्व प्रशिक्षक आर्सन वेंगरले फिफाको ग्लोबल फुटबल विकास प्रमुख हुन्। उनले यो विवादास्पद योजना रद्द हुनु ‘अति आवश्यक’ भएको बताएका छन्। उनले आफूलाई यो योजनाबारे मिडियाबाट मात्र थाहा भएको र फिफा पारदर्शी हुनुपर्ने माग गरेका छन्।
फिफा महासचिव मटियास ग्राफस्ट्रोमले यो घटनालाई दुःखद र निन्दनीय भनेका छन्। उनले फिफाका कर्मचारीहरूलाई एक पत्र लेख्दै यो समय बुझ्न र स्वीकार गर्न कठिन भएको बताएका छन्।
जोर्डन फुटबल संघका अध्यक्ष प्रिन्स अलीले इन्फान्टिनोमाथि निकै गम्भीर आरोप लगाएका छन्। उनका अनुसार फिफाले जोर्डनले पाउनुपर्ने पुरस्कार रकम रोकेर राखेको छ।
इन्फान्टिनोलाई फेरि अध्यक्ष चुनिनका लागि समर्थन गरे मात्र त्यो पैसा दिने भन्दै फिफाले 'ब्ल्याकमेल' गरेको उनको दाबी छ। उनले इन्फान्टिनोको नेतृत्वमाथि प्रश्न उठाउँदै जोर्डनले यस्तो अनैतिक दबाब स्वीकार नगर्ने स्पष्ट पारेका छन्।
इन्फान्टिनोका वरिष्ठ सल्लाहकार कार्लोस कोर्डेइरोले यो योजनाले फुटबलको भविष्य नै बन्धक राख्ने भन्दै राजीनामा दिइसकेका छन्।
युरोपेली फुटबल महासंघले यो विषयलाई लिएर फिफामाथि कानुनी कारबाही गर्ने चेतावनी दिएको छ।
प्रिन्स अलीले जोर्डनका समर्थकहरूलाई अमेरिकामा भएको विश्वकप हेर्नका लागि भिसा नदिएको विषयमा पनि फिफाको आलोचना गरेका छन्।
इन्फान्टिनोले अहिले मोरक्कोमा आफ्ना कानुनी, वित्तीय र सञ्चार प्रमुखहरूसँग छलफल गरेर यो विवाद सुल्झाउने प्रयास गरिरहेका छन्।
