विश्व फुटबलको सर्वोच्च निकाय फिफा (फिफा) गम्भीर आन्तरिक संकटमा फसेको छ। युरोप (युएएफए), उत्तर अमेरिका (कोन्काकाफ) र एसिया (एएफसी) ले संयुक्त रूपमा फिफा अध्यक्ष जियानी इन्फान्टिनोमाथि विश्वासको आधारभूत पक्ष उल्लंघन गरेको गम्भीर आरोप लगाएका छन्।
तीन महासंघले खुल पत्र जारी गर्दै पछिल्लो घटनाक्रमको विषयमा फिफामा अन्तरिकमा रुपमा नभइ तेस्रो पक्षबाट छानविन हुनु पर्ने माग गरेका छन्।
खुल पत्र जारी गर्नेमा एएफसीका अध्यक्ष सलमान बिन इब्राहिम अल खलिफा, कोन्काकाफका अध्यक्ष भिक्टर मोन्टाग्लियानी र युएएफएका अध्यक्ष अलेक्जेन्डर चेफेरिन छन्। साथै पत्रमा तीन महासंघका महासचिवको पनि हस्ताक्षर छ।
फिफाले विश्वकप फुटबलको केही बेच्ने गोप्य योजना बनाएको विषयमा यो विवाद चर्किएको हो। तीनवटै महासंघले यस कदमलाई केवल एउटा प्रक्रियागत त्रुटि मात्र नभई निर्णय क्षमताको गम्भीर असफलता भनेका छन्। उनीहरूले इन्फान्टिनोलाई यस्तो व्यक्तिको रूपमा चित्रण गरेका छन् जसले ‘फुटबल खेल नै आफ्नो अधिनमा रहेको र आफू कसैप्रति उत्तरदायी हुनु नपर्ने’ ठानेका छन्।
महासंघहरूले फिफाको कार्यशैलीमाथि प्रश्न उठाउँदै भनेका छन् कि विश्वकप जस्तो महत्वपूर्ण प्रतियोगिताको सेयर बेच्ने प्रस्ताव निकै छोटो समयमा र कुनै ठोस परामर्श बिना ल्याइएको थियो।
यो योजना सदस्य संघहरूले राम्रोसँग अध्ययन गर्न नपाउँदै पारित गराउन खोज्नुको पछाडि सुक्ष्म जाँचबुझलाई सीमित गर्ने मनसाय रहेको उनीहरूको दाबी छ। फिफाले यसलाई सञ्चारको असफलता भने तापनि महासंघहरूले यसलाई जानाजानी गरिएको छलका रूपमा व्याख्या गरेका छन्।
मोरक्कोमा भएको एउटा महत्वपूर्ण नेतृत्व बैठकमा फिफा काउन्सिलका सदस्यहरू वा निर्वाचित पदाधिकारीहरूलाई नबोलाई केवल फिफाद्वारा नियुक्त कर्मचारीहरूलाई मात्र संलग्न गराइएको पत्रमा उल्लेख छ। यसले फिफा नेतृत्वले चुनिएका प्रतिनिधिहरूलाई भन्दा आफ्ना कर्मचारीहरूलाई प्राथमिकता दिए र अमर्यादित आचरण प्रदर्शन गरेको आरोप लगाइएको छ।
यो विवाद सार्वजनिक भएपछि फिफाले आफैं प्रतिवेदन पेश गर्ने बताएको छ। तर तीन महासंघले फिफा प्रशासन वा यसका कर्मचारीहरूबाट हुने कुनै पनि छानबिनलाई अस्वीकार गरेका छन् । उनीहरूले यो घटनाको पूर्ण निष्पक्ष छानबिनका लागि पूर्ण रूपमा स्वतन्त्र तेस्रो पक्ष नियुक्त गर्नुपर्ने अडान राखेका छन्।
