पेरिस सेन्ट जर्मेन (पीएसजी) ले एस्टन भिल्लामाथि कठिन जित निकाल्दै लगातार दोस्रो पटक युइएफए सुपर कपको उपाधि जितेको छ।
साल्जबर्गमा भएको खेलमा ६२औं मिनेटमा डेसिरे डुएले गरेको गोल नै पीएसजीको जितमा निर्णायक बन्यो। भिडियो असिस्टेन्ट रेफ्र ले अफसाइड चेक गरेपछि मात्र उक्त गोलले मान्यता पाएको थियो।
खेलको २०औं मिनेटमा ख्विचा करात्स्खेलियाले उत्कृष्ट प्रहार गर्दै पीएसजीलाई सुरुवाती अग्रता दिलाएका थिए। तर, पहिलो हाफको अन्तिम समय (४५औं मिनेट) मा एस्टन भिल्लाका १७ वर्षीय स्ट्राइकर ब्रायन म्याजोले गोल गर्दै खेल बराबरीमा ल्याए।
आफ्नो डेब्यु खेलमै गोल गरेका म्याजो सुपर कपको इतिहासमा गोल गर्ने सबैभन्दा कान्छा खेलाडी बनेका छन्। इंग्ल्याण्डको यू-१७ टोलीबाट खेल्ने म्याजोले यसअघि दुईवटा राम्रा अवसर गुमाएका थिए, तर जोन म्यागिनको क्रसमा हेडमार्फत गोल गर्दै उनले टोलीलाई खेलमा फर्काए।
म्याजोका लागि यो गोल विशेष रह्यो, किनकि उनी गत जनवरीमा १० मिलियन पाउण्डमा मेट्जबाट एस्टन भिल्ला आएका थिए। तर फिफाको प्रतिबन्धका कारण उनले ८ महिनासम्म खेल्न पाएका थिएनन्। अगस्टको सुरुमा 'कोर्ट अफ आर्बिट्रेशन फर स्पोर्ट' मा पुनरावेदन जितेपछि मात्र उनलाई खेल्ने अनुमति मिलेको थियो।
गत वर्ष टोटनह्यामलाई हराएर पहिलो पटक यो उपाधि जितेको पीएसजीले यसपटक पनि ट्रफी जोगाउन सफल भयो। एस्टन भिल्लाले गोलका धेरै प्रयास गरे पनि पीएसजीका गोलकिपर मात्भे साफोनोभले उत्कृष्ट बचाउ गर्दै बाधक बने।
यो हारसँगै एस्टन भिल्लाका प्रशिक्षक उनाई एम्रीको नाममा एउटा खराब रेकर्ड बनेको छ। उनले सुपर कपका चारवटै फाइनल हारेका छन्। यसअघि उनले सेभिया र भिल्लारियलबाट पनि हार बेहोरेका थिए।
यस्तै, सोमालियाका रेफ्री ओमार आर्टनले यो खेल खेलाएर इतिहास रचेका छन्। उनी सुपर कप खेलाउने पहिलो गैर-युरोपेली रेफ्री बनेका हुन्।
