पोर्चुगिज सुपरस्टार क्रिस्टियानो रोनाल्डोले फिफा विश्वकप २०२६ पछि अन्तर्राष्ट्रिय फुटबलबाट संन्यास लिनेबारे आफूले सोचिसकेको खुलासा गरेका छन्। तर, पोर्चुगललाई थप सफलता दिलाउन सक्ने विश्वास रहेकाले उनले आफ्नो खेल जीवनलाई निरन्तरता दिने निर्णय गरेको बताएका छन्।
४१ वर्षीय रोनाल्डोले यसै सिजनमा सन् २०२६ को विश्वकप आफ्नो अन्तिम विश्वकप हुने पुष्टि गरेका थिए। त्यसपछि उनको अन्तर्राष्ट्रिय भविष्यबारे अन्योल थियो। तर, प्रशिक्षक जोर्जे जेसुसले नेसन्स लिगका लागि घोषणा गरेको पोर्चुगलको २५ सदस्यीय टोलीमा रोनाल्डो पनि समेटिएका छन्।
बिहीबार राति लिस्बनमा वेल्सविरुद्ध हुने खेलसँगै पोर्चुगलको नेसन्स लिग अभियान सुरु हुँदैछ। त्यसअघि रोनाल्डोले आफ्नो करियरमा १ हजार गोल पूरा गर्ने लक्ष्यसमेत दोहोर्याएका छन्। उक्त उपलब्धि हासिल गर्न उनलाई अब २१ गोल आवश्यक छ।
विश्वकपपछि संन्यासबारे सोचेको थियो भन्ने प्रश्नमा रोनाल्डोले भने, ‘हो, मैले सोचेको थिएँ। म सधैं आफ्ना निर्णय र भविष्यबारे सोच्ने गर्छु।’
तर, पोर्चुगलका राष्ट्रपति र प्रशिक्षकसँग छलफल गरेपछि आफूले राष्ट्रिय टोलीलाई अझै योगदान दिन सक्ने महसुस गरेको उनले बताए।
‘म अझै पनि राष्ट्रिय टोलीलाई उसले चाहेको सफलता हासिल गर्न सहयोग गर्न सक्छु भन्ने विश्वास गर्छु। गोल मात्र होइन, मैदानबाहिर पनि म टोलीलाई सहयोग गर्न सक्छु,’ रोनाल्डोले भने।
रोनाल्डो पोर्चुगलबाट दुई पटक नेसन्स लिगको उपाधि जितिसकेका छन्। अब तेस्रो पटक उपाधि जित्नु आफ्नो व्यक्तिगत लक्ष्यसँगै टोलीको पनि महत्वपूर्ण लक्ष्य भएको उनले बताए।
‘दुवै लक्ष्य महत्वपूर्ण छन्। १ हजार गोल र राष्ट्रिय टोली दुवै। नेसन्स लिग जित्नु पनि हाम्रो लक्ष्य हो। प्रतियोगिता बिहीबारदेखि सुरु हुँदैछ र यो नयाँ युग हो,’ उनले भने।
पोर्चुगलको टोलीमा फाबियो सिल्भा, रेनाटो भेइगा, नुनो मेन्डेस, जोआओ नेभेस र फ्रान्सिस्को कोन्सेइकाओजस्ता युवा खेलाडी पनि छन्। रोनाल्डोले नयाँ पुस्ताका खेलाडीलाई सहयोग गर्न पाउनु आफ्नो राष्ट्रिय टोलीमा निरन्तर रहने निर्णयको एउटा कारण भएको बताए।
‘यो नयाँ युवा पुस्ता हो। तर, मेरो लागि मुख्य कुरा मैदानमा हुनु, गोल गर्नु र टोलीलाई खेल जिताउन सहयोग गर्नु हो,’ उनले भने।
युवा खेलाडीले आफूलाई उदाहरणका रूपमा हेर्ने गरेको उल्लेख गर्दै रोनाल्डोले आफूले त्यो जिम्मेवारी निरन्तर पूरा गर्ने बताए।
‘युवा खेलाडीहरूले क्रिस्टियानोलाई किन मन पराउँछन् भन्ने मलाई थाहा छ। उनीहरूले मलाई उदाहरणका रूपमा हेर्छन् र म त्यो भूमिका निरन्तर निभाउनेछु। म संन्यास लिएपछि पनि... अर्को १० वर्षसम्म!’ उनले ठट्टा गर्दै भने।
रोनाल्डोले आफ्नो शारीरिक अवस्थालाई पनि प्राथमिकता दिने बताएका छन्। हरेक खेल खेल्नुभन्दा आफूले राम्रो महसुस गर्नु महत्वपूर्ण रहेको उनको भनाइ छ।
लिस्बनमा आयोजित पत्रकार सम्मेलनमा पोर्चुगलका प्रशिक्षक जोर्जे जेसुसले रोनाल्डोलाई ‘पोर्चुगल र राष्ट्रिय टोलीको प्रतीक’ भनेका थिए।
त्यस क्रममा रोनाल्डोले आफ्नो लामो करियरमा भोग्दै आएको आलोचनाबारे पनि बोले। इंग्ल्यान्ड, स्पेन र इटालीका ठूला क्लबमा खेल्दा समेत आफू निरन्तर आलोचनाको सामना गर्दै आएको उनले बताए।
‘पोर्चुगलमा मैले आफूलाई सबैभन्दा धेरै माया गरिएको महसुस गरेको छु। समर्थकहरूबाट पनि पोर्चुगिजहरूले मलाई माया गरेको महसुस गर्छु,’ उनले भने।
केही टेलिभिजन च्यानलले आफूलाई निरन्तर आलोचना गर्ने गरेको भन्दै उनले भने, ‘उनीहरूले मलाई बन्दुकले गोली हानेर समाप्त पार्न खोजे, तर म त्यसबाट उम्किन सक्छु।’
‘म यसका लागि अभ्यस्त भइसकेको छु। २० वर्षभन्दा बढी समयदेखि म यो गरिरहेको छु। तर, मेरा सम्झनाहरू मलाई माया गर्ने मानिसहरूसँग छन्,’ रोनाल्डोले भने।
-1790072299.jpg)
-1746009348.jpg)
