इंग्लिस क्लब म्यानचेस्टर सिटीमाथि लागेको ११५ वटा वित्तीय नियम उल्लंघनसम्बन्धी आरोपमा फैसला भएको खबरले विश्व फुटबल तरंगित बनेको छ।
चार वर्ष लामो अनुसन्धानपछि सिटीमाथि लगाइएका आरोपको सुनुवाइ सन् २०२४ सेप्टेम्बरमा सुरु भएको थियो। बीबीसीका अनुसार स्वतन्त्र आयोगले अधिकांश आरोपमा सिटीलाई दोषी ठहर गरेको स्रोतहरूले बताएका छन्।
तर यो प्रकरणको अन्तिम आदेश भने अझै बाँकी छ। दोषी ठहर भएपछि सिटीले कस्तो सजाय पाउँछ भन्ने निर्णय हुन बाँकी छ। स्वतन्त्र आयोगको लिखित फैसला सार्वजनिक भएपछि मात्र सजाय र निर्णयका विस्तृत आधार स्पष्ट हुनेछन्।
के हुन् सिटीमाथिका ११५ आरोप?
सिटीमाथि सन् २००९–१० देखि २०१७–१८ सम्मको अवधिसँग सम्बन्धित वित्तीय विवरणमा सही जानकारी नदिएको, खेलाडी तथा प्रशिक्षकलाई गरिएको भुक्तानीबारे सही विवरण नदिएको र यूईएफए तथा प्रिमियर लिगका वित्तीय नियम उल्लंघन गरेको आरोप लगाइएको थियो।
आरोपमध्ये ५४ वटा सही वित्तीय जानकारी उपलब्ध नगराएको, १४ वटा खेलाडी तथा प्रशिक्षकको भुक्तानीसम्बन्धी विवरणमा र ७ वटा प्रिमियर लिगको नाफा तथा दिगोपन नियम सम्बन्धी छन्। त्यस्तै यूईएफएका नियम उल्लंघनका ५ आरोप र प्रिमियर लिगको अनुसन्धानमा सहयोग नगरेको ३५ आरोप छन्।
म्यानचेस्टर सिटीले भने सुरुदेखि नै गलत काम गरेको आरोप अस्वीकार गर्दै आएको छ। दोषी ठहर भए क्लबले अपिल गर्ने बताइएको छ।
अब सिटीलाई कस्तो कारबाही हुन सक्छ?
स्वतन्त्र अनुशासन आयोगसँग विभिन्न विकल्प छन्। सिटीमाथि अंक कटौती, जरिवाना वा सबैभन्दा गम्भीर अवस्थामा प्रिमियर लिगबाटै हटाएर तल्लो डिभिजनमा घटुवा गर्न सकिने विकल्प रहेको बीबीसीले जनाएको छ।
तर अहिले नै सिटीलाई प्रिमियर लिगबाट घटुवा गरिने वा उपाधि खोसिने निश्चित भइसकेको भने होइन। सजायबारे अन्तिम निर्णय आउन बाँकी छ।
सिटीका कुन–कुन उपाधि प्रभावित हुन सक्छन्?
आरोपमा समेटिएको अवधिमा सिटीले तीनवटा प्रिमियर लिग उपाधि जितेको थियो—२०११–१२, २०१३–१४ र २०१७–१८। सो अवधिमा उसले २०११ को एफए कप तथा २०१३–१४, २०१५–१६ र २०१७–१८ को ईएफएल कप पनि जितेको थियो।
यदि आयोगले उपाधि पुनर्वितरण गर्ने निर्णय गर्यो भने सम्बन्धित सिजनका उपविजेता क्लबहरूलाई फाइदा पुग्न सक्छ। तर कुनै उपाधि अन्य क्लबलाई दिने निर्णय भइसकेको छैन।
अपिल कहाँ पुग्छ?
सिटीले फैसला वा सजायविरुद्ध अपिल गर्ने सम्भावना रहेको छ। क्लबको कानुनी टोलीको नेतृत्व लर्ड प्याट्रिक प्यानिक केसीले गरिरहेका छन्, जसले यसअघि सन् २०२० मा यूईएफएको दुई वर्षे युरोपेली प्रतिबन्धविरुद्ध सिटीको अपिलमा काम गरेका थिए।
त्यसैले ११५ आरोपमा फैसला आएको भए पनि म्यानचेस्टर सिटीको यो लामो कानुनी लडाइँ तत्कालै सकिने अवस्था छैन। अब सबैको नजर स्वतन्त्र आयोगको लिखित फैसला र त्यसपछि हुने सम्भावित कारबाही तथा अपिल प्रक्रियामा छ।
-1788334994.jpg)
.JPG)
-1746513231.jpg)
