पोर्चुगलका प्रशिक्षक जोर्गे जेसुसले क्रिस्टियानो रोनाल्डोले चाहेमा राष्ट्रिय टोलीमा पुनरागमन गर्न सक्ने बताएका छन्।
रोनाल्डोले राष्ट्रिय टोलीबाट कहिले र कसरी बिदाइ लिने भन्ने निर्णय पनि उनकै हातमा रहेको जेसुसको भनाइ छ।
४१ वर्षीय रोनाल्डो नर्वेविरुद्धको खेलमा बेन्चमै बसेका थिए। त्यसपछि डेनमार्कविरुद्ध पनि सुरुआती ११ मा नपर्ने जानकारी पाएपछि उनले पोर्चुगलको नेसन्स लिग टोलीको क्याम्प छाडेका थिए।
रोनाल्डोले पोर्चुगलका लागि २३४ खेलमा १४६ गोल गरेका छन्। दुवै तथ्यांक अन्तर्राष्ट्रिय फुटबलमा विश्व कीर्तिमान हुन्।
क्याम्प छाडेपछि रोनाल्डोले सामाजिक सञ्जालमा आफूले राष्ट्रिय टोली छाड्नुको कारणबारे ‘उचित समयमा पोर्चुगिज जनतालाई सत्य बताउने’ बताएका थिए।
तर प्रशिक्षक जेसुसले रोनाल्डोसँगको सम्बन्ध बिग्रिएको संकेत गरेनन्। नर्वेविरुद्ध आइतबार भएको खेलपछि उनले भने, ‘यदि उनी चाहन्छन् भने राष्ट्रिय टोलीमा फर्किनेछन्। निर्णय उनकै हुनेछ।’
जेसुसले भने, ‘अर्को टोली छनोट हुनुअघि हामी यस विषयमा कुरा गर्न सक्छौँ। तर क्रिसले नै निर्णय गर्नेछन्। उनले राष्ट्रिय टोलीसँगको आफ्नो यात्रा आफूले चाहेअनुसार अन्त्य गर्नुपर्छ। त्यो कसरी गर्ने भन्ने निर्णय पनि उनकै हो।’
जेसुसले रोनाल्डोलाई आफूलाई अझै आवश्यक रहेको पनि स्पष्ट पारे।
‘मैले पहिलोपटक टोली छनोट गर्दा नै भनेको थिएँ– मलाई तिमी चाहिन्छौ, खेलोस् वा नखेलोस्, मेरो नजिक रहनुपर्छ। अहिले पनि म त्यही कुरा भनिरहेको छु,’ उनले भने।
रोनाल्डोले वेल्सविरुद्धको पहिलो खेलमा सुरुआत गरेका थिए। तर नर्वेविरुद्ध उनी बेन्चमा थिए। दोस्रो हाफमा उनलाई वार्मअप गर्न पठाइए पनि मैदानमा प्रवेश नगराइएपछि उनी असन्तुष्ट बनेको बताइएको छ।
प्रतिस्पर्धात्मक अन्तर्राष्ट्रिय खेलमा सन् २००८ पछि पहिलोपटक रोनाल्डो पूरै समय बेन्चमै बसेका थिए।
डेनमार्कविरुद्ध पनि रोनाल्डो सुरुआत नगर्ने प्रशिक्षक जेसुसले पत्रकार सम्मेलनमा बताएपछि उनले टोलीको क्याम्प छाडेका थिए।
रोनाल्डो टोलीबाट बाहिरिएपछि एसी मिलानका स्ट्राइकर गोन्कालो रामोसले भने उत्कृष्ट प्रदर्शन गरिरहेका छन्। उनले रोनाल्डोबिनाको तीनवटै सुरुआती खेलमा गोल गरेका छन्।
नर्वेलाई २–१ ले हराउँदै पोर्चुगल नेसन्स लिगको अन्तिम आठमा प्रवेश गरेपछि जोआओ क्यान्सेलोले रोनाल्डोलाई पोर्चुगलको कप्तान तथा देशले पाएको अहिलेसम्मकै उत्कृष्ट खेलाडीका रूपमा सम्मान गरे।
‘क्रिस्टियानो हाम्रा कप्तान हुन्। उनी पोर्चुगलले अहिलेसम्म पाएको सबैभन्दा उत्कृष्ट खेलाडी हुन्। उनीसँगको यात्रा पक्कै पनि उत्कृष्ट तरिकाले अन्त्य हुनेछ। तर अहिले महत्वपूर्ण कुरा चार खेल जित्नु हो,’ क्यान्सेलोले भने।
नुनो मेन्डेसले पनि रोनाल्डो फर्किएमा टोलीले उनलाई खुला हृदयले स्वागत गर्ने बताए। ‘राष्ट्रिय टोलीमा आउने हरेक खेलाडी स्वागतयोग्य छन्। क्रिस फर्किए भने हामी उनलाई खुला हृदयले स्वागत गर्नेछौँ,’ उनले भने।
पाँचपटक बालोन डी’ओर जितेका रोनाल्डोले पोर्चुगललाई सन् २०१६ को युरोपियन च्याम्पियनसिपसँगै दुईपटक नेसन्स लिगको उपाधि जिताउन महत्वपूर्ण भूमिका खेलेका छन्।
पोर्चुगलले अब नोभेम्बर १४ मा डेनमार्कलाई घरेलु मैदानमा आतिथ्य गर्नेछ भने त्यसको तीन दिनपछि वेल्सको भ्रमण गर्नेछ। यी खेलमा रोनाल्डो फर्किन्छन् कि उनको पोर्चुगल यात्राको अन्तिम अध्याय सुरु भइसकेको हो—अब निर्णय स्वयं रोनाल्डोकै हातमा छ।
.JPG)
