अर्जेन्टिनाका स्टार फुटबलर लियोनल मेसीले गोल गर्दै आफ्नो अन्तर्राष्ट्रिय फुटबल करिअरको सुखद अन्त्य गरेका छन्।
३९ वर्षीय मेसीले अर्जेन्टिनाका लागि आफ्नो २०८औं तथा अन्तिम अन्तर्राष्ट्रिय खेलमा बेनिनविरुद्ध गोल गरे।
उनले दोस्रो हाफमा पेनाल्टीमार्फत गोल गर्दै अर्जेन्टिनाका लागि आफ्नो गोलसंख्या १२६ पुर्याए। अर्जेन्टिनाले मैत्रीपूर्ण खेलमा बेनिनलाई ३–० ले हरायो।
मेसीले खेलमा निकोलस ओटामेन्डी र निको पाजका गोलका लागि पनि पास मिलाएका थिए। उनले पूरा ९० मिनेट खेले।
अन्तर्राष्ट्रिय फुटबलबाट सन्न्यास लिने घोषणा उनले अगस्टमै गरेका थिए।
अन्तिम खेलपछि ८५ हजार दर्शकले खचाखच भरिएको ब्युनस आयर्सस्थित मोनुमेन्टल रंगशालामा मेसीलाई विशेष सम्मान गरिएको थियो।
रंगशालामा लेजर लाइट शो, प्रत्यक्ष सांगीतिक प्रस्तुति र विभिन्न कार्यक्रम आयोजना गरिएको थियो।
मेसीले दर्शकलाई करिब १० मिनेट सम्बोधनसमेत गरे।
सम्बोधनका क्रममा उनले आफू मैदान छाड्न नचाहेको बताए। उनका केही सहकर्मी खेलाडी भावुक बनेका थिए।
म्यानचेस्टर सिटीका एन्जो फर्नान्डेजसहितका खेलाडीको आँखामा आँसु देखिएको थियो।
अन्तर्राष्ट्रिय करिअर टुंग्याए पनि मेसीको क्लब फुटबल यात्रा भने जारी रहनेछ।
उनी अमेरिकी मेजर लिग सकर क्लब इन्टर मायामीबाट खेलिरहेका छन् र उनीसँग सन् २०२८ को सिजनको अन्त्यसम्मको सम्झौता छ।
अर्जेन्टिनाको राजधानीमा मेसीको बिदाइ समारोह भावुक बनेको थियो।
रंगशालातर्फ जाने क्रममा बसमा मेसीले आँसु पुछिरहेको दृश्य सार्वजनिक भएको थियो। खेलअघि राष्ट्रिय गान बज्दा पनि उनी भावुक देखिएका थिए।
खेल सुरु हुनुअघि रंगशालामा भव्य आतिसबाजी गरिएको थियो।
मैदानमा मेसीको चर्चित १० नम्बर अंकसहितको अर्जेन्टिनाको विशाल जर्सी राखिएको थियो, जसमा स्पेनी भाषामा ‘ग्रासियास’ अर्थात् ‘धन्यवाद’ लेखिएको थियो।
.JPG)
