विश्वकप फुटबल २०२६ अन्तर्गत 'लास्ट-३२' को एक अत्यन्तै नाटकीय खेलमा बेल्जियमले सेनेगलमाथि रोमाञ्चक जित दर्ता गरेको छ।
खेलको अन्तिम समयसम्म २-० ले पछि परेको अवस्थालाई उल्टाउँदै बेल्जियमले ३-२ को नतिजासहित अन्तिम १६ मा आफ्नो स्थान सुरक्षित गरेको हो।
खेलको ८६ औँ मिनेटसम्म सेनेगल २-० ले अगाडि थियो। सेनेगलका लागि हबिब डिएरा र इस्माइला सारले गोल गर्दै टोलीलाई बलियो स्थितिमा पुर्याएका थिए। बेल्जियम प्रतियोगिताबाट बाहिरिने निश्चित जस्तै देखिन्थ्यो।
तर, दोस्रो हाफमा मैदान प्रवेश गरेका रोमेलु लुकाकुले ८६ औँ मिनेटमा गोल गर्दै बेल्जियमको आशा जगाए। त्यसको लगत्तै ८९ औँ मिनेटमा कप्तान युरी टिलेमान्सले हेडिङमार्फत गोल गरेपछि खेल २-२ को बराबरीमा पुग्यो र खेल अतिरिक्त समय मा धकेलियो।
खेलको बीचमा टिलेमान्स र लियोन्ड्रो ट्रोसार्डबीच मैदानमै चर्काचर्की भएको देखिएको थियो, तर पछि उनीहरू नै टोलीको जितका आधार बने।
अतिरिक्त समयको पनि अन्तिम समय अर्थात् १२५ औँ मिनेटमा बेल्जियमले पेनाल्टी पायो। भिडियो असिस्टेन्ट रेफ्रीको ७ मिनेट लामो समीक्षापछि दिइएको उक्त पेनाल्टीमा टिलेमान्सले कुनै गल्ती नगरी गोल गरे र बेल्जियमलाई ३-२ को नाटकीय जित दिलाए।
सेनेगलका लागि यो हार निकै पीडादायी रह्यो। अफ्रिका कप अफ नेशन्सको उपाधि जितेको सेनेगलले यस विश्वकपमा ठूलो लक्ष्य राखेको थियो, तर अन्तिम समयमा सम्हालिन नसक्दा उसको यात्रा समाप्त भएको छ।
अब बेल्जियमले अन्तिम १६ मा अमेरिका वा बोस्निया-हर्जगोभिना मध्ये एक टोलीसँग मंगलबार सामना गर्नेछ।
