अमेरिकाको डलासमा भएको एउटा रोमाञ्चक खेलमा मिकेल मेरिनोले इन्जुरी समयमा निर्णायक गोल गरेपछि स्पेनले पोर्चुगललाई हराउँदै फिफा विश्वकप २०२६ को क्वाटरफाइनलमा स्थान बनाएको छ।
यस पराजयसँगै पोर्चुगल र उसका स्टार खेलाडी क्रिस्टियानो रोनाल्डोको विश्वकप यात्रा सकिएको छ। केही दिनअघि मात्र ४१ वर्षीय रोनाल्डोले यो आफ्नो अन्तिम विश्वकप बताएका कारण रोनाल्डोको विश्वकप जित्ने सपना भने अधुरै रहेको छ।
खेलको दोस्रो हाफमा स्पेनले खासै राम्रो अवसर सिर्जना गर्न नसकिरहेको बेला खेलको ९१औं मिनेटमा फेरान टोरेसको पासलाई सदुपयोग गर्दै आर्सनलका मिडफिल्डर मेरिनोले गोलकिपर डिओगो कोस्टालाई छक्याउँदै सुन्दर गोल गरे।
स्पेन र पोर्चुगलबीचको यो नतिजा सन् २०१० को विश्वकपको याद दिलाउने खालको छ, जहाँ स्पेनले पोर्चुगललाई यस्तै स्कोरले हराएको थियो।
खेलको तेस्रो मिनेटमै स्पेनका मिकेल ओयार्जाबलले गोल गर्ने सुनौलो अवसर गुमाएका थिए। त्यसपछि पोर्चुगलका गोलकिपर कोस्टाले स्पेनका लमिन यामल र एलिक्स बाएनाका प्रहारलाई उत्कृष्ट ढंगले बचाए। ४१औं मिनेटमा पोर्चुगलका नुनो मेन्डेसको प्रहार क्रसबारमा ठोक्किएपछि खेल पहिलो हाफसम्म गोलरहित बराबरीमा रह्यो।
दोस्रो हाफमा पोर्चुगलले केही सुधारिएको खेल प्रदर्शन गरे पनि रोनाल्डो मैदानमा निकै निराश देखिए। खेलभरि उनले मात्र १९ पटक बल छुन पाए, जसमा डिब्बाभित्र त केवल ३ पटक मात्र बल पुगेको थियो।
स्पेनका गोलकिपर उनाई सिमोनले यस विश्वकपमा अहिलेसम्म ६०९ मिनेटसम्म कुनै गोल खाएका छैनन्। खेल सकिएपछि १८ वर्षीय युवा स्टार लमिन यामलले रोनाल्डोलाई सान्त्वना दिएको क्षणले फुटबलको एउटा पुस्ताको अन्त्य र अर्को पुस्ताको उदयको संकेत गर्थ्यो।
स्पेनका खेलाडी र समर्थकहरूले यो जितलाई भव्य रूपमा मनाइरहँदा फुटबल जगतका महान खेलाडी रोनाल्डोको विश्वकप यात्रा भने आँशु र निराशाका साथ टुङ्गिएको छ।
