बलिउड अभिनेता सनी देओल अभिनीत फिल्म 'बोर्डर' को सिक्वेल बन्ने भएको छ।
बिहीबार निर्माण टिमले एक भिडिओ सार्वजनिक गर्दै 'बोर्डर २' को आधिकारिक निर्माण घोषणा गरेका हुन्। उक्त भिडिओ अभिनेता सनीले पनि आफ्नो सामाजिक सञ्जालमा सेयर गरेका छन्।
'एक फौजी आफ्नो २७ वर्ष पुरानो कसम पुरा गर्न आउँदैछ। भारतको ठूलो वार फिल्म बोर्डर २,' उनले लेखेका छन्।
अनुराग सिंहले निर्देशन गर्न लागेको फिल्ममा भुषान कुमार, कृष्ण कुमार, जेपी दुत्ता, निधी दुत्ताको लगानी रहनेछ।
यो फिल्म २३ जनावरी २०२६ देखि प्रदर्शन हुनेछ।
भारतीय सञ्चारमाध्यम बलिउड लाइफका अनुसार सनीले 'बोर्डर २' का लागि आफ्नो पारिश्रमिक बढाएका छन्। उनले यस फिल्मका लागि ५० करोड भारू लिने बताएका छन्। तर निर्माण टिमले यसबारे आधिकारिक जानकारी दिएका छैनन्।
सनीले 'गदर २' को लागि २० करोड भारू पारिश्रमिक लिएका थिए। यसअघि उनी एक फिल्मको पारिश्रमिक ६ करोड भारू लिन्थे।
'बोर्डर २' को छायांकन सन् २०२४ देखि सुरू हुने बताइएको छ।
यो सनी देओलको सन् १९९७ मा आएको 'बोर्डर' को दोस्रो भाग हो। यस फिल्ममा भारत र पाकिस्तानबीचको द्वन्द्व देखाइएको थियो।
