भारतीय फिल्म 'इक्किस' ले आशाजनक सुरूआत गरेको छ।
श्रीराम राघवनको निर्देशनमा बनेको युद्ध ड्रामा 'इक्किस' ले प्रदर्शनको पहिलो दिनमै भारतमा ७ करोड भारू कमाइ गर्न सफल भएको हो। धर्मेन्द्र, जयदीप अहलावत, अगस्त्य नन्दा र सिमर भाटिया अभिनीत फिल्मको यो कमाइ प्रारम्भिक अनुमानभन्दा झन्डै तीन गुणा बढी हो।
फिल्म जनवरी १ मा भारतभर करिब ४ हजार पर्दामा रिलिज भएको थियो। यसअघि डिसेम्बर २५ मा रिलिज हुने तय भएको फिल्म एक साता ढिला गरी रिलिज भएको हो।
अहिले पनि रणवीर सिंह अभिनीत 'धुरन्धर' ले बक्स अफिसमा बलियो पकड बनाइरहेका कारण 'इक्किस' ले कडा प्रतिस्पर्धा सामना गर्नुपरेको छ। यद्यपि, 'वर्ड अफ माउथ' का कारण आगामी दिनमा पनि फिल्मले सुखद् कमाइ गर्ने अपेक्षा गरिएको छ।
ट्रेल वेबसाइट स्याकनिल्कका अनुसार 'इक्किस' को बिहीबार बिहानको शोमा करिब १२ प्रतिशत अकुपेन्सी रहेकोमा दिउँसो ३५ र साँझसम्म अकुपेन्सी ४७ प्रतिशतसम्म पुगेको थियो। रिलिज अघिसम्म फिल्मले पहिलो दिन २ देखि २.५ करोड भारू मात्र कमाउने अनुमान गरिएको थियो।
बिहीबार 'धुरन्धर' ले १५ करोड भारू कमाइ गरेको भए पनि 'इक्किस' त्यसको प्रभावमा पूर्ण रूपमा ओझेलमा नपर्नु फिल्मका लागि सकारात्मक पक्ष मानिएको छ।
'इक्किस' भारतको सर्वोच्च वीरता पुरस्कार ‘परमवीर चक्र’ प्राप्त गर्ने सबभन्दा कान्छो दोस्रो लेफ्टिनेन्ट अरूण खेतरपालको जीवनमा आधारित छ। फिल्मले १९७१ को भारत–पाकिस्तान युद्धको समयमा खेतरपालको साहस र बहादुरीको वर्णन गर्दछ। खेतरपालको भूमिकामा अगस्त्यले अभिनय गरेका छन् भने उनको बुवाको भूमिकामा धर्मेन्द्र छन्।
यो धर्मेन्द्रको अन्तिम फिल्मसमेत हो।
-1746009348.jpg)
