बहुप्रतीक्षित भारतीय फिल्म 'रामायण' को वितरण अधिकार महंगो मूल्यमा बिक्री भएको छ।
निर्माता तथा निर्देशक करण जोहरको धर्मा प्रोडक्सन्सले ३५० करोड भारूमा फिल्मको हिन्दी संस्करणको वितरण अधिकारी खरिद गरेको दाबी गरिएको हो।
भारतीय संचारमाध्यम बलिउड हंगामाको रिपोर्ट अनुसार यो रकम भारतीय फिल्म इतिहासकै सबभन्दा ठूलो थिएटर वितरण सम्झौता मानिएको छ।
यसअघि सबभन्दा ठूलो सम्झौता मानिएको ‘किङ’ को रेकर्डलाई करिब १०० करोड भारूले 'रामायण' ले उछिनेको बताइएको छ।
'रामायण' मा रणवीर कपूर, साई पल्लवी, यश, सन्नी देओल र रवी दुबे मुख्य भूमिकामा छन्। फिल्मको निर्देशन नितेश तिवारीले गरेका हुन्। उनले यसअघि 'दंगल', 'छिछोरे' र 'बवाल' जस्ता सफल फिल्म निर्देशन गरिसकेका छन्।
'रामायण' को बजेट करिब १,५०० करोड भारू बताइएको छ।
फिल्ममा रणवीर कपूर राम, साई पल्लवी सीता, यश रावण, सन्नी देओल हनुमान र रवी दुबे लक्ष्मणको भूमिकामा देखिनेछन्। यी कलाकारहरूको संयोजनका कारण पनि यो फिल्मप्रति दर्शकमाझ उच्च उत्साह देखिन्छ।
नमित मल्होत्राले निर्माण गरिरहेको 'रामायण' यस वर्षको सबभन्दा प्रतीक्षित फिल्ममध्ये एक मानिएको छ। स्रोतलाई उद्धृत गर्दै बलिउड हंगामाले फिल्मप्रति फिल्मकर्मी र वितरकहरूमा उच्च अपेक्षा रहेको जनाएको छ।
रिपोर्टअनुसार धर्मा प्रोडक्सन्सले फिल्मलाई भारतभर अहिलेसम्मकै सबभन्दा व्यापक प्रदर्शन गराउने तयारी गरिरहेको छ। साथै, निर्माता नमित मल्होत्रा आफैं पोस्ट-प्रोडक्सनमा सक्रिय रहेर फिल्मका दृश्य प्रभावलाई अन्तर्राष्ट्रिय स्तरको बनाउने प्रयासमा जुटेको पनि उल्लेख गरिएको छ।
फिल्मको ट्रेलर छिट्टै सार्वजनिक गर्ने तयारी छ।
'रामायण' दुई भागमा प्रदर्शन गरिनेछ। पहिलो भाग अक्टोबर ३०, २०२६ (कात्तिक १३) दिपावलीको अवसरमा विश्वव्यापी रूपमा प्रदर्शन हुनेछ। दोस्रो भाग २०२७ को दिपावलीमा प्रदर्शन गर्ने तय छ।
