भारतीय अभिनेता इमरान हाश्मी अभिनीत फिल्म 'आवारापन २' ले प्रदर्शनअघि नै यसको पहिलो भागको लाइफटाइम कमाइलाई उछिनेको छ।
फिल्मको बुकिङ उत्साहजनक देखिएकाले 'आवारापन २' बलिउडमा सन् २०२६ का ठूला ओपनिङमध्ये एक हुन सक्ने अनुमान गरिएको हिन्तुस्तान टाइम्सले जनाएको छ।
सन् २००७ मा प्रदर्शनमा आएको 'आवारापन' सुरूमा बक्स अफिसमा असफल भएको थियो। त्यसबेला फिल्मले भारतमा करिब ७.७ करोड भारू मात्र नेट कमाइ गरेको थियो। तर पछि टेलिभिजन, होम मिडिया र स्ट्रिमिङ प्लेटफर्ममार्फत दर्शकमाझ लोकप्रिय बन्दै गएपछि यसले 'कल्ट फ्लोइङ' प्राप्त गरेको थियो। यही लोकप्रियताले अहिले यसको सिक्वेल ‘आवारापन २’ लाई बलियो सुरूआत दिलाएको बताइएको छ।
रिपोर्टअनुसार 'आवारापन २'ले प्रदर्शन हुन करिब १८ घण्टा बाँकी रहँदासम्म पहिलो दिनका लागि १.३ लाखभन्दा बढी टिकट बिक्री गरिसकेको छ। फिल्मले ओपनिङ डेका लागि करिब ४ करोड भारू बराबरको टिकट बिक्री गरेको हो।
व्यापारिक स्रोतहरूले पहिलो सप्ताहन्त तथा त्यसपछिका दिनका लागि कुल एड्भान्स बुकिङ ९ करोड भारू ग्रस (करिब ७-८ करोड नेट) नाघेको अनुमान गरेका छन्। यससँगै फिल्मले प्रदर्शनअघि नै पहिलो भागको लाइफटाइम कमाइलाई उछिनेको हो।
'आवारापन' ले पहिलो दिन ७९ लाख भारू कमाएको थियो भने पहिलो सप्ताहन्तमा २.८८ करोड भारू नेट कमाइ गरेको थियो। यसको तुलनामा ‘आवारापन २’ ले पहिलो दिन १५ देखि २० करोड भारू नेट कमाउन सक्ने व्यापार विश्लेषकहरूको अनुमान छ।
यो फिल्म सनी देओल अभिनीत 'बटवारा १९४७; सँग एकै दिन शुक्रबारदेखि प्रदर्शनमा आउँदैछ। तर व्यापार विश्लेषकहरूले 'आवारापन २' ले बक्स अफिस प्रतिस्पर्धामा अग्रता लिन सक्ने बताएका छन्।
नितिन कक्कर निर्देशित 'आवारापन २' मा इमरान हाश्मीले शिवम पण्डितको भूमिकामा पुनरागमन गरेका छन्। फिल्ममा शबाना आजमी, दिशा पटानी र सुविन्दर विक्कीको पनि अभिनय छ।
'आवारापन २' अगस्ट १४ (शुक्रबार)देखि विश्वभर प्रदर्शनमा आउँदैछ।
