सांगीतिक रियालिटी शो 'नेपाल आइडल' सिजन ६ को ग्राण्ड फिनाले (अन्तिम प्रतिस्पर्धा) आज हुँदैछ।
ललितपुरको ग्वार्कोस्थित रोयल टुलिप होटलमा साँझ ५ बजेदेखि सुरू हुने समारोहमा नेपाल आइडलको छैटौं सिजनको विजेता घोषणा गरिनेछ।
यसअघिका सिजनमा फिनालेमा चार जनाबीच प्रतिस्पर्धा हुने गरिएकोमा यस पटकको सिजनमा पाँच जना प्रतिस्पर्धीहरू फिनालेमा पुगेका छन्।
अभिनय खाति (दार्जिलिङ), बबिता थापा मगर (सिक्किम), दर्शना गान्धारी (चितवन), मृनल मानन्धर (काठमाडौँ) र गंगा सोनम (सिन्धुपाल्चोक) ले उपाधिका लागि प्रतिस्पर्धा गर्दैछन्।
दर्शक तथा निर्णायकहरू दुवैले यो सिजनलाई विशेष र प्रतिस्पर्धात्मक मानेका छन्। आजको फिनालेमा प्राप्त भोटिङका आधारमा एकजना प्रतिस्पर्धीले नेपाल आइडल सिजन ६ को उपाधि चुम्नेछन्।
विजेताले नगद २५ लाख रूपैयाँ प्राप्त गर्नेछन् भने फस्र्ट रनरअपले १० लाख र सेकेन्ड रनरअपले ५ लाख रूपैयाँ पुरस्कार पाउनेछन्। तेस्रो र चौथो रनरअपका लागि भने पुरस्कारको घोषणा फिनाले समारोहमा नै गरिने आयोजक टिमले जनाएको छ।
फिनालेको प्रत्यक्ष प्रसारण एपीवान टेलिभिजनबाट हुनेछ।
नेपाल आइडलको यो सिजनमा निर्देशकका रूपमा सुरेश पौडेल र एलेन श्रेष्ठ छन्। निर्णायक मण्डलमा न्ह्यू बज्राचार्य, कालीप्रसाद बाँस्कोटा र इन्दिरा जोशी छन् भने आसिफ शाह उद्घोषक छन्।
नेपाल आइडलमा क्रमशः बुद्ध लामा, रवी ओड, सज्जा चौलागाईं, भूपेन्द्र थापा मगर र गत वर्ष करण परियार विजेता बनेका थिए।
-1746009348.jpg)
