एक मात्र प्रतिनिधि सभा क्षेत्र रहेको दोलखामा सत्ता गठबन्धनले प्रतिनिधि सभा र प्रदेश सभाका सबै क्षेत्रमा अग्रता बनाएको छ।
प्रतिनिधि सभामा नेकपा माओवादी केन्द्रका उम्मेदवार गंगा कार्कीले अग्रता बढाउँदा प्रदेशमा पनि कांग्रेसकै उम्मेदवारले अग्रता कायमै राखेका छन्।
निर्वाचन आयोगका अनुसार गणना भएको २०६९१ मत मध्ये कार्कीले ९ हजार ६२३ मत ल्याएका छन्। यहाँ नेकपा एमालेका उम्मेदवार बालकृष्ण शिवाकोटीले ८ सय ६४९ मत ल्याएर पछ्याइरहेका छन्।
यहाँ राष्ट्रिय स्वतन्त्र पार्टीका जगदिश खरेलले ७६१ मत पाएर पछ्याइरहेका छन्।
यस्तै प्रदेश सभातर्फ दुबैमा नेपाली कांग्रेसका उम्मेदवारले अग्रता बनाएका छन्।
प्रदेश १ तर्फ नेपाली कांग्रेसका उम्मेदवार कुन्दनराज काफ्लेले ८४७२ मत पाएका छन् भने नेकपा एमालेले नरबहादुर श्रेष्ठले ७३७२ मत ल्याएका छन्। यहाँ १७९६८ गणनामा राप्रपाका रामबहादुर तामाङले ८२३ मत पाएका छन्।
यस्तै प्रदेश २ को प्रत्यक्षतर्फ पनि नेपाली कांग्रेसले अग्रता लिएको छ। यहाँ कांग्रेसका बर्मा लामाले ८९८३ मत ल्याएका छन् भने एमालेका उम्मेदवार भरतबहादुर केसीले ८८२१ मत ल्याएका छन्। १९२२९ गणनामा राप्रपाका राजनबहादुर सिवाकोटीले ३९१ मत पाएका छन्।
यस्तै यहाँ समानुपातितर्फ गणना भएको ९६६६ मतमा नेकपा एमालेले ३६१६, नेपाली कांग्रेसले ३०२५, माओवादी केन्द्रले १४३३, नेकपा एकीकृत समाजवादीले २९६, राष्ट्रिय स्वातन्त्र पार्टीले ५९४ र राप्रपाले १८५ मत पाएका छन्।
मतगणना जारी छ। यहाँ मंसिर ४ मा भएको मतदानका क्रममा केही केन्द्रमा धाँधली भएपछि बिहीबार पुन: मतदान गरिएको थियो।
