शीतलहरका कारण नारायणगढ–बुटवल सडक खण्ड अन्तर्गतको दाउन्ने क्षेत्रमा राजमार्ग अवरुद्ध भएको छ। शीतलहरका कारण पश्चिम नवलपरासीको दाउन्ने खुर्सानी खोला क्षेत्रको सडक चिप्लो भएको हुँदा सवारी साधन चिप्लिने तथा अड्किने समस्याका कारण राजमार्ग अवरुद्ध भएको थियो।
राजमार्गमा केहि दिनदेखिका सवारी साधनहरुको लामो जाम लागेको छ। शीतलहरका कारण राजमार्ग अवरुद्ध हुँदा यात्रुहरुले सास्ती पाएका छन्।
जिल्ला ट्राफिक प्रहरी कार्यालय पूर्वी नवलपरासीका सूचना अधिकारी प्रहरी वरिष्ठ नायब निरीक्षक विनोद जोशीका अनुसार विस्तारै सवारी साधनहरुको जाम कटाए पनि बाक्लो हुस्सुसहित शीत परेपछि सवारी सञ्चालनमा निकै कठिनाइ भएको छ।
नारायणगढ–बुटवल सडकको पूर्वी खण्डतर्फ दाउन्नेदेखि दुम्कीबास जंगलसम्म करिब १५ सय सवारी साधनको जाम लागेको सूचना अधिकारी जोशीले बताए।
नारायणगढ-बुटवल सडक योजनाको पश्चिम खण्डका सूचना अधिकारी इन्जिनियर विकास खनालका अनुसार सडक निर्माण भइरहेको स्थानमा शीतलहरका कारण बाटो हिलो भएर सवारी साधन दाउन्नेको उकालोमा उक्लिन समस्या भएको छ।
अहिले खुर्सानी खोला क्षेत्रमा ग्राभेल गर्ने काम भइरहेको र मालबाहक सवारी साधनलाई बर्दघाट, भुताहा क्षेत्रमा रोकिराखेको सूचना अधिकारी खनालले बताए।
आयोजनाले एक सुचना जारी गर्दै वैकल्पिक सडक प्रयोग गर्न समेत अनुरोध गरेको छ।
पूर्वपश्चिम राजमार्ग हुँदै आउने र जाने सवारी साधन नारायणघाट–मुग्लिङ–पोखरा–स्याङ्जा–पाल्पा हुँदै बुटवल जान सक्नेछन्।
यस्तै, कालीगण्डकी चोक (गैंडाकोट) रामपुर पिपलडाँडा हुँदै जान सक्नेछन्।
काठमाडौंबाट बर्दघाट पश्चिम जाने र बुटवल–काठमाडौं जाने सवारी साधनहरु काठमाडौं–मुग्लिङ–पोखरा हुँदै यात्रा गर्न सक्नेछन्।
दाउन्ने खण्डमा निर्माण र मर्मतको काम समेत चलिरहेको छ। सो क्षेत्रमा शितलहरका कारण राजमार्ग हिलाम्य हुदा सवारी साधनहरु संचालनमा कठिनाइ भएको हुँदा अत्यावश्यक सवारी बाहेक अन्य सवारी साधनले वैकल्पिक सडक प्रयोग गर्न आयोजनाले अनुरोध गरेको छ।
साथै सवारी सञ्चालन गर्दा ट्राफिक नियमको पूर्ण पालना गर्न पनि आग्रह गरिएको छ।
तस्बिरहरूः
सबै तस्बिरः नेपाल फोटो लाइब्रेरी।
-1746009348.jpg)
